СВО доакъашхошта лаьрхӏа хӏамаш кийчйир мехкарча колледжаша
Мехкарча колледжаша, #МЫВМЕСТЕ яхача проектага гӏолла, СВО доакъашхошта лаьрхӏа цхьацца хӏамаш дӏаелар Къаман фронтага. Из хоам «Сердалога» бир дешареи ӏилмани гӏулакхех йолча министерстве.
«Тӏема операце доакъашхой хьаллоацаш йолча #МЫВМЕСТЕ яхача проектага гӏолла бӏухошта эшаргйола хӏамаш вӏашагӏтехар хьехархоша, студенташа, гӏо деш лелараша. Мехкарча дешара моттигашка хьагулъю хӏамаш. СПО оагӏон хӏара моттиге болх дӏахьош ба из гӏулакх хьаллоацаш», - йоах тхога бенача хоамо.
Мехка атта йоацача ханашка къаьстта белгала хул цхьанкхетар. Вай мехкахой, хьалхарча дийнахьа денз гӏо дар доаржадеш, могаш дола новкъостал цу наха де хьожаш, латташ ба. Тӏема операци йолаелча денз, дӏахьош боккха болх ба из, массане дакъа лоацаш.
Тӏема аренашка латтача бӏухошта яхьийтай молхаш, ханнахьа талхаш боаца кхача, хӏара дийнахьа эшаш йола хӏамаш, иштта кхыдола цига эшараш. Царна тӏехьа дуӏаш деш, ламазаца уж бехаш, кастагӏа цӏенах кхетарга сатувсаш ба мехка.
