«Сердало» газета болхлой даькъалабийцар ГӀалгӀайчен росгвардейцаша
«Сердало» яхача кепайоазон цӀагӀа хьоашалгӀа баьхка хилар ГӀалгӀай Республике гӀолла йолча Росгварде Урхаллен болхлой. Из дувзаденна дар массаболча журналистий цӀай- Россе зарбан Ди хиларца.
Цунца дувзаденна, моттигерча Росгварде кулгалхочун гӀончас баркал аьлар кепайоазон цӀен кулгалхочунна Курскенаькъан Хадижата, «Сердало» корреспондента Гаьгенаькъан Мартинайна.
Тха болхлошта баркал оалаш дола совгӀаташ далар дувзаденна да, къаман бӀухой болх даим хьагойташ корреспонденташа къахьийга хиларца, иштта российски зарбан Ди дездарца.
«Баркал оал, ший ханнахьа тӀема гӀулакха Росгварде болх дӀагойташ, цу даькъ тӀара хьал дика довзийташ, хьинаре оаш къахьегарах. Из бахьан долаш, Росгварде дӀахьош дола патриотически боламаш, цар толамаш наха довзийта таро хул. Тхо тешаш да вай бувзам дӀахо а чӀоагӀлургхиларах», - аьлар подполковника Албетков Андрейс.
