«Сердало» яхача жайний зарбанчен болхлоша шоай унахцӀено техкар
ЛоархӀамеча гӀулакхе дакъа лоацаш хилар «Сердалора» болхлой. ХӀара моттиге ше-ший аргӀагӀа дӀахьош дола диспансеризаце дика гӀулакх хьаллоацаш, шоай унахцӀенон хьал малагӀча боараме да хьежар уж.
ТӀехьарча шерашка ерригача Россе, иштта вай мехка а боаржабаь дӀахьош ба из болх. Къаьстта вай къаман юкъе чӀоагӀа лоархӀаме да хан-ханнахьа из беш хилар. ЦӀий, синпха малагӀча боараме ба, сатураци миштай, шекар, халестирин лакха я е лоха я хьожаш баьхкар лораш.
«БӀарчча дийнахьа балхах боахкача наьха массаза аьттув балац поликлинике дӀабаха, чакхбовла. «УнахцӀено» яхача къаман проектага гӀолла, лораш чубола машин массайолча моттигашка дӀаухаш, болхлой могашал тохкаш хул. Цу гӀулакхо доккха дика ду бахархошта, балха тӀерабала низкъала дарашта хам баь варгвоаца новкъостал да из», - белгалдир «Сердалонна» кулгал деча Курскенаькъан Хадижата.
