ГӏалгӀайчен коммунальни боахам кердача тайпара къахьегаш хургба
ГӏалгӀайче лаьрхӀад коммунальни боахама болх, эргабаьккха, тоабе. РФ экономически дегӀаахара министра заместитела Назаров Сергейс кулгал деш дӀайихьача кхетаче, ГӏалгӀай Республикан Паччахьалкхен Председатела Сластенин Владимира гойтар энергетика, ЖКХ дика дегӀаахара программа кхоачашъеча даькъ тӀа даьха толамаш.
Царех керттердар – хин даькъ тӀара ЦаӀ вола оператор хьакхелла хилар, цо вӀашагӀтехар мехкара 96% хин-канализационни боахам. Цу кердадараша шоай толам юкъебаьккхар: лоархӀаме лаьгӀделар кхоачамбоацараш нийслуш хилар, лакхделар таронаш пайда баргболча оагӀорахьа лелаяр, дикагӀа хилар наха гӀулакх дара хьал.
Сластенина белгалдир, 2024 шера 1 600 авари хинна моттиг тоаяр. Карарча хана балхаш дӀахьош да 3,6 км хин турбаш Наьсаре, Наьсарен кхале хувцаш, иштта 2 километр хин турба чуйилла йоалаш латт Илдарха-Гӏалий тӀа. Цул совгӀа МагӀалбика кхале 2 км хин турбаш чуйоахкаш я, СоагӀапча хьалъеш я насосий станци.
Карарча шера проекташ кхоачашъе лаьрхӀад 328 млн сома. Из ахча дӀадохийтаргда дукха хин турбаш хувцара, хий чудиллар кердадоаккхаш.
ГӏалгӀай Республикан Паччахьалкхен зарбан болх лелабераша белгалдоаккх, цу дерригане а таро лу республикан коммунальни хьалаш кердача, дикагӀча боарам тӀа даха.
