«Тамаш яхьаш доагӀалда цӀай» яха концерт хилар Мужеча
Мужечен культуран ЦӏагӀа «Тамаш яхьаш доагӀалда цӀай» яха концерт дӀадихьар. Цига юртарча бахархошта, Керда шу гаргагӀорташ долга хоалуш, дика салоӀам хилар.
«Зал хьалйиза гулбелар бахархой, цун сердал, хозал, паргӀато хоалуш яр хӀаранена. Къегаш йолча лампаша, цӀай кепара тоаяьча моттиго, ший тайпара йӀовхал лора гулбеннарашта.
Сцена тӀа яьлар культуран Цӏен кхоллама тоабаш. Концерта программанна юкъе дар халкъа халхараш, цӀайна лаьрхӀа кийчдаь иллеш. Къонача артисташа дийкъар шоай начӀал, цӀай кийчбалара хозал нахаца. Цхьайолча хана сатем отташ, цул тӀехьагӀа тӀоарашца артисташ безбеш дӀахьош яр из ха», - аьлар «Сердало» газетага концерт вӀашагӀделлараша. Кердача шерца дог - уйла дӀаувш, сапаргӀатадаьнна ха наха елар цу кхетачено. Гулбеннараш раьза болаш дӀа-юха къаьстар, юхьмараш тӀа белабалар долаш.
