«Эккажкъонгий-Юрта шин лоалахочоа юкъе, вахаре нийслуш долча бахьанах, дов даьлар. Цига цхьанне шоллагӀчоа когах топ техар. Из дов хеза араийккхача дас, цӀийла уллаш вола ший воӀ а бе топ йоаллаш латта лоалахо а бӀаргавайна, корзагӀваьнна, топ техачун че чу урс Ӏеттар. Топ кхийтта чов хиннар дарбанче хьалчувигав, хӀаьта урс кхийттар яьча човнах веннав», - аьлар «Сердало» газетага ГӀалгӀайче гӀолла йолча Россе МВД.

Полице болхлой хиннар тохкаш ба. Урс теха саг вийнар, Ӏаьдала эшача хана хьатӀавоагӀаргволаш, каьхата кулг яздаь ва. Иштта Ӏаьдало венначунга хинна топ хьаяьккхай.