ГӏалгӀай культболхлоех Ерригроссийски хьажара-яхьа лауреаташ хилар
Культуран вайцигара викалаш чубоагӀаш бар «Росси: къаман хьалаш» яхача халкъа кхоллама Цӏеной проекта Ерригроссийски хьажара-яхьа. Из хилар Россе къамий культурай Центре, РФ Президента хьакхайкадаьча Даьхен лорабой Шера чудоагӏаш, иштта Халкъашта юкъерча даим шоай моттигашка дахаш долча къамий метташ дездара итт шу доалаш. Кхетачено вӀашагӀтехар дукхача Россе къамий культурай белгало лораеш, дегӀайоалаеш къахьегаш бола нах.
«Программа вӀашагӀъеллаяр паччахьалкхен культуран политика керттерча лостамех. Хӏара балха даькъ тӀа гуш дар культуран тӀехьале дегӀайоалаяра декхараш. Хьалхарча боарама лауреат хилар Оалкама культуран Цӏен викал Хамхой ПаьтӀамат, «Сийлахь -йоккхача Коталон Турпалхой» яха тохкама болх гойтар цо. « ЦаӀ йола граждански юкъарло, культуран наькъа проекташ» яхача даькъ тӀа кхоалагӀча боарама лауреат хилар «Дукхача къаман Росси: Сийлахь Коталон тӀехье» яхача проектах, из гойтар Мужечен культуран Цӏен викалаша», - аьлар «Сердало» газетага, ГӏалгӀайчен халкъа кхоллама, культуран - кхетачений Республикански Цӏен кулгалхочун гӀончас Котанаькъан Марема.
Цу яхье вӀашагӀкхийтар культуран урхаллений говзанчаш, цар шоайла дийцар балха даькъ тӀара хоамий-методически хьал. Дерригаш а, цига дакъа лацара Россе 25 мехкара хьачуденна 50 совгӀа дехар дар.
