«ЛоархӀаме да тахан цу даькъ тӀа къахьегаш хилар, вай культуран моттигаш кхоллам лакхбеш хилар. Карарча шера, искусствон Колледжа балха тӀа эшаш бола керда гӀирс Ӏалашбаьб, хьакхоллаш я Арштера модельни оала библиотека, иштта Илдарха гӀалий тӀарча исбахьален искусствай музейна эшараш Ӏалашдеш латт. «Кхоллама нах» яха проект бахьан долаш, юрташка культуранца дувзаденна начӀал дола болхлой хьаллоац, цар балха говзал лакхъяра, кхоллама кӀийле чӀоагӀъяра терко лоаттаю», - аьлар ший телеграм-оагӀонга гӀолла ГӏалгӀайчен Кулгалхочо Келаматанаькъан Махьмуд-Ӏаьлас.

Мехка культуран болхлоша шоай балха говзал лакхъеш латт, из чӀоагӀа лоархӀаме а да гӀалгӀай къаман культуран тӀехьале лораяра.

ГӏалгӀай мехка йистедаьлар Йоккхача-Ачалкхен культуран Цӏа цӀенхаштта тоадар, цун наӀараш хьаелларгья цу юрта бахача наха.

Юртхой хьежаш ба цу диканга, цар таро хургья шоай культурни кхетаченаш дӀаяхьа.

Иштта хьалдеш латт лоамарча Жӏайрахьа культуран Цӏа, из карарча шера оагӀой бетта 1-ча дийнахьа хьаделларгда. Республикан культура дегӀайоалаяра боаккхаш бола цхьаькха гӀа ба из.

Республике хьалъяь йоалаш я театра, кинон таханарча заман хьалий Центр. Уж балхаш йистедаьнначул тӀехьагӀа дукха культуран кхетаченаш дӀаяхьа таро хургья, тайп-тайпара проекташ тӀаэцаргья, уж кхоачашъергья.