«Ферха нахьарах» бича санна бар Наьсарера Ӏам
09.01.2025 14:19
ГӀалгӀайчен эггара дукхагӀа нах гуллуш йолча моттиге; бахархошта, хьаьшашта хоза Ӏалама сурт дайра укх деношка. Ферха нахьарах тара хи тӀа биллача шаво къайладаьккхадар Ӏама доккха дакъа, яхаш, дийцар «Сердало» газетага.
«Сомача шан кӀалха нийслуш йола хӀамаш бахьан долаш, из тамашийна сурт эттар вай Ӏам тӀа», - аьлар цхьан вахархочо.
Белгалдаккха деза, Наьсарен Ӏама доазув укх тӀехьарча шин шера хувцаденнад. Укхаза дукха къахьийгад из доазув тоадеш. ХӀаьта цу хи чу дукха дийнаташ лел: чкъаьрий, пхьидарч, богапхьидарч. Иштта гӀадвугаш я акха боабашкаш, кхокхарча Ӏул, цига лелаш дола оалхазараш.
