«Ашарий ахкан сайрено» гулбир Магасе цу искусствон мах ховраш
«Ашарий ахкан сайре» дӀайихьар Магаса театра, кинон, таханарча заман тароний Центре, цига гулбелар сийлахь искусство езараш, цун мах оттабе ховраш, яхаш, хоам бу «Сердало» газетага из болх вӀашагӀбеллараша.
«Артисташа дӀаоалача иллешца сакъердалуш дукха бар. Царна лаьрхӀа иллеш даьхар Эккажанаькъан Маринас, Беканаькъан Хадижас, Эккажанаькъан Розас, Гаьгенаькъан ИбрахӀима, ПхьугӀой Амира, ЦӀечой Жаннате, Исраилова Ларисас. Оздой Лейлас гобой яха зурма лекхар, Ӏарпенаькъан Хьавас – чӀондарг, ГабраӀаланаькъан Мадинас - фимбо, маримба», - аьлар хоамо.
Гулбеннараша йоккха терко тӀаяхийтар, дукха ха йоацаш «ГӀалгӀайчен къона оазаш» яхача II-ча Республикански вокально- инструментальни яхье котъяьннача ГетагӀазанаькъан Раянайна. Укхаза из яр хьаьша санна.
«Таханара концерт боккъонца дола ашарий цӀай хинна дӀаэттар массанена. Тхо хьожаш да кхоллама а начӀала а майда хьакхолла вай артисташта. Кхетаче яр вай бахархошта культура йовза таро луш, дегагӀоз луш, иштта къона иллиалархой хьаллоацаш», - аьлар ЦТКиКИ кулгалхочо Зортанаькъан Мадинас.
