«Лоацача хана мара из бацар аьнна, цун лерхӀам ца беш Ӏе йиш яц. Балха хиларо ондаргашта ший тайпара кхетам лу, кердадараш вахара юкъедоаладу, кортамукъале йолаш хила Ӏомабу, къахьегама мах бе ховш хулийт. Балха говзал хиларо иштта царна таро лу, шоай ахча нийса леладе. Дешара мукъа вола ха болх беш дӀаяхьаро, массехк паргӀато лу сага. Наха юкъе хиларо, тӀадилла декхар кхоачашдаро царна кхыйола вахара таронаш хьаелл», - аьлар Келаматанаькъан Махьмуд-Ӏаьлас цу лоархӀамеча гӀулакха мах оттабеш. Цо белагалдир, иштта бехктокхаме къахьегам кхетабеш хилча, кхувш боагӀараша цун лерхӀам дикагӀа бу, цӀена хьадаьккхача ахчан хам а бу, чоалханерча хьалашка дикагӀа чакхбала Ӏомалу, кердадараш хьаэц, вахара говзал дукхагӀа хул.

Белгалду, мукъа ха йолча хана болх беш хиларах, бетта царна лургда 4,500 сом цхьан сага. Ахча республика бюджетера луш да. Из деррига а 567 эзар сом да. Уж балха оттабар кхоачашдеш я ГӀалгӀай Республикан къахьегама Министерство, дешареи Ӏилмани Министерствос дакъа а лоацаш.

Хьалхарча аргӀагӀа цу юкъеболхараш ба таро йоацарий дезал, иштта берий гӀулакха йолча полице дӀаязбаь латтараш, уж ба ондаргаш. Цар де дезар да дешара доазонаш кийчдар, га дӀайогӀар, иштта, мемориала дагалоаттама улгаш тӀа лостам беш, кулг тохар.