ИнгГУ магистра дешархо хьалхаваьлар, Халкъашта юкъерча Ӏилман-тохкама яхье
ГӏалгӀай паччахьалкхен университета юридически факультета магистрант волча Мураданаькъан Илеза, Халкъашта юкъерча VӀ-ча Ӏилман- тохкама яхье хьалхарча боарама Диплом делар. Лакха мах оттабир, «Конституце бокъо, паччахьалкхен гӀишло» яхача яхьа даькъанна чубоагӏаш цо баьча балха.
«Яхь вӀашагӀъеллар яр «Керда Ӏилма» яха Халкъашта юкъера Ӏилман бувзама центр, из я «Халкъашта юкъерча зарбанхой ассоциаце» (гӏ. Петрозаводск) доакъашхо. Яхь дӀахьош хилара маӀан дар, вай заман Ӏилман толамаш доаржадар, иштта Ӏилман-технически кхоллама дукхагӀа кагирхой юкъеозар», - аьлар «Сердало» газетага ГӏалгӀайчен керттерча вузе.
«Керда Ӏилма» яхача Ӏилман Халкъашта юкъерча центра кулгалхоша баркал аьлар Мураданаькъан Илеза Ӏилман кулгалхочоа, юридически Ӏилмай доктора, ИнгГУ паччахьалкхен исторе, теоре, иштта юрфака бокъон кафедра профессора Тхабисимова Л.А., тохкама болх дӀахьош цо новкъостал дарах, цига лакха профессиональни борам гойтарах.
