«Цу гӀулакха хетаяьча кхетаче дакъа лоацаш хилар шахьара администраце кулгалхочун гӀонча вола ГӀаьнтамаранаькъан ЯрагӀи, «Россерча ветераний союз» яхача ерригача Россе юкъарча моттига кулгалду Гелисханаькъан Мухьмад, шахьара совета, «Даьхен Лорбой» яхача тӀема доакъашхой гӀулакхех йолча ганза филиала болхлой. Из хоам «Сердало» газетага бир МагӀалбикерча администрацера.

1978-ча шера хьайийллар МагӀалбике тӀема, къахьегама сийлен музей. Цу гӀулакха хьалхаэттар вар къамах дог лазаш хинна сийдола воӀ Чербажанаькъан Асланбека Башир. Дуккхача шерашка къахьийгар цо музея ганз хьалъюзаш. Шахьаре лоархӀаме моттиг дӀалоацаш я, из дӀаваьнначул тӀехьагӀа цун цӀи лелаеш йола музей. Дукха хӀама лорадеш йола из моттиг, мах баь варгвоацаш, я тахан. Белгалде деза, Чербажанаькъан Башира гулдаьраш, МагӀалбика «ТӀема сийлен шахьар» яха цӀи луча хана чӀоагӀа накъадаьннилга.