Магӏалбикера №1 йола гимнази цӏенхаштта тоае лерхӏ тӏадоагӏача шера
«Кагирхойи бераши» яхача къаман, «Эггара толашагӏдар – берашта» яхача моттигерча проектага гӏолла Магӏалбикера №1 йола гимнази цӏенхаштта тоае лерхӏ тӏадоагӏача шера. 2010-ча шера хьалъяь из гӏишло кулг тоха дезача кхаьчай тахан. 14 оагӏонцара балхаш дӏахьош, дикка меттайоалаергья из дешара моттиг.
«Тӏера куц тоадаь, иштта тхов, кораш, наӏараш, тока саьргаш хувцаш болх дӏахьоргба цига. Цул совгӏа, керда интерактивни улгаш, компьютераш, кхыйола кабинеташка эшаш йола хӏамаш эцаргья», - дийцар «Сердалога» цу оагӏонцарча министерстве. Хьатӏадоагӏача шера бӏаьстан хана дӏаболабе лерхӏ гимназера болх.
Тендерцара гӏулакхаш чакхдаьлча, ховш хургда малагӏча моттиго из болх дӏатӏаийцаб. 87 млн совгӏа сом ахча да цу гӏулакха хьакъоастадаьр.
Дешара шу долалуча хана кийча хила езаш я гимнази дешархойи хьехархойи тӏаэца. Хӏанзалца гимназерча тоабо салоӏача ахкан деношка кулг тохаш болх лоаттабора цига, хӏаьта тахан къаман проекташка, федеральни оагӏонга гӏолла доккхий хувцамаш де аьттув ба.
