Дин оагӀонга диллача, сага дегӀа новкъа дола хӀама леладар доагӀаш дац. КӀеззига мукъагӀа кхеташ волча сага уж хӀамаш леладергдац. Из хьожаргва уж дика доаца гӀулакхаш ца леладе.

ХӀара сага ший могашал лорае еза, тӀехьагӀа шийна хьалхашка оттадаь декхараш кхоачашде таро хургйолаш, тӀаккха укх дуненна чам а дикагӀа ховргба цунна.

Психологе оагӀонга диллача, гаргарча нахаца айхха бувзам лелабеш хиларо во оамалаш цалелаяра новкъостал ду. Республике кхотабенна нах бахаш хиларах, нах шоайла бовзаш хул. Цу хьале, урам тӀа дӀа а этта, гӀаьле увзаш латта йиш яц, сцена тӀа волаш санна, из а лоравала везаш ва.

Вай юкъарлоно из хьал тӀаэцаш а дац. Цудухьа къайлагӀа леладе дезаш хул, боккхагӀчарех лечкъаш.

Цхьан ираза, массехк итт шу хьалха дӀаяьлар, гӀаьлен кӀур тохаш, неца бувш хинна наьха оамал. ДӀаяхача ханашка, моллагӀа вола цхьа хьаьша веча, неций латаргдоацаш увз аз, яхаш, бегаш а беш, гӀаьле увзар. ХӀанз дукхагӀа йолча кхетаченашка гӀаьле увзараш кӀезигагӀа хулаш боагӀа, цул совгӀа дукхача шерашка лораша цӀи йоаца лазар цакхетийтар хьалхадоахаш хиларах а юхабаьннаб гӀаьле ца увзаш, шоай дегӀа зулам дергдола хьал ца леладеш.

Цул совгӀа, ГӀалгӀайче ший тайпара спортивни гӀишлош хьаелларца, вахара хьалаш хувцаденнад - уж дукхача шахьарашка, юрташка хьалхара хьаеллаш яр, цо тӀаэзар кагирхой.

Кхувш йоагӀача тӀехьенна дика хов, могаш а хоза а хилар - из доккха ираз долга. Малав иштта хила ловш воацар? Массанена ловш дар да из!

Малар дувца вай доахке, из хьалха хинначоа юхе кӀезигӀа мел. Цу даькъ тӀа, зуламаш леладар, бокъонаш телхаяр, наха кхераме хилар геттара а белгалдоалаш а унзара а хул.

Вайцига корта бохабу малар менна, веха, урамашка гӀолла борал телхаш лелаш саг бӀаргаго хала да. Молаш бараш а шорттига, къайлагӀа мала хьож. Бакъда из цар гучадоал, менна болаш машинаца боагӀаш хуле. Наькъашка го йиш я леладер дика кхетадеш боаца малар меннараш, цар керта чу малара Ӏи мара хӀама хилац…

Тахан вайна юкъе нийслуш ба наркомани яржара дола бахьан, малар юкъера дӀадалар да аьнна хетараш. Из Ӏовдала къамаьл да. Нах воча хӀаманна тӀакхувш цахиларо уж диканга кхоачабергба.

ДӀаяхача а таханарча а хана бахаш болча хьаькъал долча наха белгалду, саг тамашийна хилар. Из даим безам болаш хул ахка вахара юхе хила, унзарча хьала юкъе хила. Массанена, дукхача хана денз, ховш да, гӀаьлено сага могашал эшаелга, хӀаьта а цунца ваха гӀерт из.

Шо дукхача шерашка денз гӀаьле увзаш дале, из йита атта хургдац. Геттара а хала хургда. Валлалца цунцара чам дӀабалац сага.

Иштта да корта бохабеча маларцара хьал а, цунах дикахетар ца хулилга ховш да. Кхалсага хозал а могашал а цо дӀайоаккх, хӀаьта маӀа саг а могаш волаш ваха, иразе ший вахар кхолла пайдана хилац.

Вай лакхе белгалдаьхараш селхан хинна кхоачамбоацараш да. Хургдолчунга хьалха хьожаш, ГӀалгӀайче дикача вахара масал гойташ хургйолаш, къахьега деза вай. Тайп-тайпара ха яьннача эзараш болча наха йоккха дегагӀоз хургья цох.

Иштта хургдолаш, хьажа деза вай хӀара дезале, дешара моттиге, боахаме. Вай дерригаш, сийрдача кертаца уйла а еш, дахара тӀакхувш хила деза.