Таханарча юкъарлон оагӏонцарча балха юкъе кулгалхочо хьинаре дакъа лацар хьагойташ да из гӏулакх. Паччахьалкхен, юкъарлон оагӏонашца журналисташа боаггӏача боараме болх дӏахьош хилар чӏоагӏа лоархӏаме да. Бӏаь шу хьалха денз, доккха истори долаш хьадоагӏаш дола «Сердало» ший никъ дӏахьош да массайолча моттигашкара лоархӏамедараш доаржадеш. Даьхен лорабой оагӏув хьаллоацаш, Даьхенцара безам, лерхӏам чӏоагӏбара тӏехьа дикка къахьегаш ба редакце.

«Деррига а Котало бахьане» яхача ганза дӏахьош бола никъ бовзийтар редакцена хьалхашка латтача керттерча декхарех да. Гӏо деш йолча ганза кулгалхошца, бахархошца юххьанца денз бувзам лоаттабеш хьайоагӏа редакци. Газета оагӏонашка гӏолла, цун таьрахьашца дувзаденнарех йолча кӏийленга гӏолла бахархошка хоам бора, тахан Даьхен гӏулакха арабаьнна тӏема аренашка лелача бӏухошта, иштта кердача российски моттигашка халача хьале этта бахарашта гӏо де моллагӏча сага аьттув болга, цар гӏулакхага хьажар вайна массанена лоархӏаме долга. Кузнецов Михаилагара баркал оалаш каьхат хьакхачаро белгалду, «Сердало» яхача Кепайоазон цӏено дӏахьош бола болх федеральни оагӏонца зийнилга. Къаман фронто гӏо деш дола боламаш доаржадарах яздеш, бахархошта цар никъ дӏабовзийташ, цу дикача гӏулакха берригаш тӏаоза хьожаш, къахьийгад «Сердалос».

Белгалде деза, тахан цу балха иштта лакха мах оттабар Кепайоазон цӏен лоархӏаме долга. Курскенаькъан Хадижата баркал кхайкадеш дола каьхат хьаэцаш белгалдир, Къаман фронта оагӏув хьаллацар редакце декхар долга. Россена хьалхашка латта лоархӏамедараш тахан мишта кхоачашду дӏадовзийтара тӏехьа хьинаре болх дӏахьош ба тахан, мехкарча хоамий оагӏонашка гӏолла. Моттигерча кепайоазон оаз чӏоагӏа лоархӏаме хул вай боккхача мехка, хӏама хьаллацара тӏехьа хозаш хилча.