2019-ча шера тов бетта 8-ча дийнахьа инаугураци хилар вай мехкадаь Келаматанаькъан Махьмуд-Iаьлий. ШозлагIа ший балха тIа чIоагIвелар из 2024-ча шера тов бетта 8-ча дийнахьа. Эрсий, гIалгIай меттала ше даьча къамаьлаца, мехкадас чIоагIо йир, ГIалгIай Республикан Конституци лоархIаш, къаман бокъонаш лораеш, боаггIача боараме болх дIахьош дIачакхвала. Цу дийнахьа денз, мехка хьалхашка латта чоалхане гIулакхаш, доккхий декхараш ший тоабанца, хьинаре къахьегаш, юстардоахаш; мехка хьал хIара денна тоадеш, дукха дикаш мехка доаржадеш, хьавоагIа республикан кулгалхо Келаматанаькъан Махьмуд-Iаьла.

Укх массехк шера къахьегаш, мехка тIалаьтта доккхий декхараш тIера дIадоахаш, массайолча моттига болх лертIача боаккхаш къахьег цо. Экономически хьал меттаоттадара дIабихьар, тахан дIахьош латтар чIоагIа болх ба. Ше хьатIавенача дийнахьа денз, хьакимаша шоай болх боаггIача боараме дIахьоргболаш къахьега волавелар мехка Кулгалхо. Бахархой дегашка чIоагIвелар из цу хана; тешаме, къамах дог лазаш вола кулгалхо санна. 

Массанена бIаргадайра, Мехкада боккхача низаца дика хувцамаш де волавеннилга, мехка хьал тоадара тIехьа цо чIоагIа къахьегилга. ХIаьта цу юхьигах хьахиннар тахан вай массане зувш да, мехка гIолла дIа-юха хьежача. Дикка дегIаений мехкара промышленность, гIишлошъяра оагIонцара балхаш, юртбоахам, иштта кхыдараш. 

Доккхий, дика хувцамаш да вай унахцIенон, дешара, спорта, туризма, культуран оагIонашца. ХIаьта вай наькъий хьал а тахан боккха толам болаш да. Юрташкара, шахьарашкара моттигаш меттайоалаеш, наха паргIато хургьяраш юкъедоахаш къахьег мехка. Дуккхача халонашта духьалъотта везаш, халача хьале кхаьча латтараш тоаде дезаш хилар вай Мехкада, хьатIавенача хана. Доккхий кредитацара декхараш дар республиканна тIалаьттараш, болх ца беш сайца лаьтта заводаш, фабрикаш йолаялийта езаш яр, массехк шу хьалха денз хьалъе йолаяь, сайца латташ гIишлош яр, мичара доагIа ца ховш тIадена ковид, лакха говзал йола болхлой цахилар, болх бе моттигаш цатаар - дукха дар хьалхашка лаьттараш…

Иштта боккха болх бар терроризм, экстремизм яхача зуламашта духьала, наркомани яха во дохадеш дIаболабе безар. Деррига декхараш вай тахан дувца эттача, уж дукха хургдар. Мехкадас цу хана дIаболабаь болх тахан боккха аьттув луш хиннилга гуш да вайна. РФ Президента Путин Владимира гIо деш, федеральни министерствошца бувзам чIоагIбеш, уж оарцагIйоахаш кагирхошта керда, аьттув луш дола наькъаш хьаделлаш, тишденна лаьттар тоадеш, сайца лаьтта моттигаш юха йолайолийташ къахьийгар Мехкадас. Кердадараш юкъедоаладеш, пайдане хургда аьнна мел хетар доаржадеш, боккха болх бар дIаболабаьр.

Цул совгIа, Даьхен гIулакха латта кийча болча къаман къонгашта дикка гаьнабала, мехка къахьегаш хила аьттув луш проект йоаржайир республике. Паччахьалкхен моттигашка шоай начIал, говзал гойта йиш йола къонабараш ба тахан кердача наькъ тIа баьннараш. Бахархошта чIоагIа лоархIаме да, Келаматанаькъан Махьмуд-Iаьла массахана нахаца хилар, цар хаттарашта жоп дала, дашха кийча хилар. Цу гIулакхо хьагойт из ший къамах дог лазаш волга. Мехкада массахана нахаца бувзаме хиларах, цо аьннар хьаллоацаш, моллагIа болам, кхетаче дIахьош хилча раьза болаш, арабала кийча ба бахархой.

Иштта хилар Палестинерча, Донбассерча наха хIамаш гулъеча хана. Цхьа дезал санна могаш дола гIо де эттар вай къам. Доккха новкъостал лоаттаду тахан Мехкадас СВО доакъашхошта, цар дезалашта. Цу наьха хьашташ кхоачашдара, терко яра тIехьа тIахьожам лоаттабу цо. Тахан къаман юхь дIахьокхаш латтача деналах, майралах бизза болча къонгех доаккхал деш ва из. Ше хьатIавенача дийнахьа денз, мехка массайолча оагIонцара гIулакхаш меттадоаладе гIерташ латташ, дукха хIама кIоаргга дайзар Мехкадаьна.

Политикаца, экономикаца, социологе оагIонца, кулгалдарца дукха хIама дикка шаьрдеш, довзаш къахьегаш хьавоагIа республикан хаьалха латта саг. Дувцилга а доацаш, доккхий, чоалхане декхараш да республикан Кулгалхочунна дIахо а хьалхашка латтараш - иштта ба цун къахьегама никъ. Бакъда тахан вай массане кхетадеш да, иштта бехктокхаме, хьинаре, ший къамах, мехках дог лазаш вола саг ший балха тIа дикка гаьна варгволга. Цун уллув латта кийча ба мехкахой, гIалгIай хIама тоаде гIерташ латтача цун оагIув хьаллоацаргболаш да къам!