Берий даьшта-ноаношта хьалхадаьккхар, хьаткъаш кхераме болга
Гӏалгӏайчен унахцӏенон министерствос, хоамий хьехама болх дӏахьош, даьшта-ноаношта хьалхадаьккхар дукхача баьцашта юкъера къаьстта хьаткъаш берашта кхераме болга, яхаш, дийцар «Сердало» газетага лорий боахаме.
«Из чаьтара тара йола йоккха буц го йиш я машенаш лелача наькъа йистошка, кхай тӏа, вай республикан хин йистошка. Хьаткъаш бӏарг тӏаотташ ба, цудухьа бераша цун турбилгаш зурмаш еш лелаю. Из буц кхераме я, берий кулгаш доагадеш хиларах. Нагахьа санна из хьокхаеннача моттиге малх тӏаотташ хилча, кулг доагаде тарлу», - йоах хоамо.
Бера цӏока тӏа кхаьчача, цо из геттара сиха доагаду, цун лар юс дуккхача шерашка. Къаьстта унзара ба хьаткъа, бӏаргашка боде. Цо бӏаргса доадар кхерам ба.
«Дӏагойта берашта цу йоархӏа сурт, хьехам бе, цӏаккха а цунна юхе ма аха аьле», - дувц лораша.
Нагахьа санна цох кулг кхийттадале, сихха кулгаш дила деза, дуккха сапа чоп боаккхаш, хий ӏотӏаухийташ. Из моттиг ши ди-бийса даллалца, сердал кхетаргйоацаш хӏама хьоарчаяь, дӏаехка деза. Ше дарба де мегаргдац, сиха лорага ваха веза.
Салаӏа ишколера цӏахийцача берий оамал я, ӏаламца сакъердалуш, тайп-тайпара баьцовгӏаш йовза гӏерташ. Цу юкъе лоархӏаме да шоай кхерамзлен ӏалашо е ховш хилар.
