Шолже лаьтташ леладеча даькъ тӏара кхоачамбоацараш гучадаьхар
Тӏахьожама болх дӏахьош, Гӏалгӏайчен Шолже гучадаьхар лаьтта леладара даькъ тӏара, иштта предпринимателий балхацара кхоачамбоацараш, яхаш, дийцар «Сердало» газетага шахьара мэре зарбан болх лелабераша.
«Моттигерча администраце болхлоша, къахьегама Паччахьалкхен инспекце, йоал йоахарий, прокуратуран, полице новкъосталца вӏашагӏъеллар Осканаькъан, Сейнарой урамаш тӏарча предпринимателий балха гӏишлошка хьажара йола рейдаш. Цун бахьан дар, наьха къахьегама бокъонаш лорайой хар, иштта лаьтта леладара, йоала закон леладара хьал мишта латт хьажар. Цхьайолча моттигашка гучадаьхар кхоачамбоацараш хилар, из бахьан долаш доагӏаш дола каьхаташ оттадир. Цул совгӏа, шоай доалахьара хӏама леладерашта хьалхадаьккхар законо дӏадехар фуд, иштта кхоачамбоацараш юстардахара йола ха а белгалйир», - аьлар хоамо.
«Гӏишлоний кулгалхошта хьалхадаьккхар, шоай доалахьа лаьтта леладара каьхаташ законо дӏадеххача беса хила дезилга, болхлошцара къахьегама бувзам цхьоагӏонца лелабар, иштта контрольно-кассови техника лелаяр», - аьлар хоамо.
