Запорожски, Брянски, Липецки областашкара бераш хургда, вай мехка салоӏаш
Запорожски, Брянски, Липецки областашкара 125 бер хургда укх шера вай мехка салоӏаш. «Сердалога» из хоам бир Мехкадаь зарбан болх лелабераша.
«Чӏоагӏа лоархӏаме да тайп-тайпарча моттигашкарча берий вай мехка шоашта ма хетта салаӏа, могашал тоае, вай истори, культура, ӏадаташ довза аьттув хилар», - белгалдир вай мехкадас Келаматанаькъан Махьмуд-ӏаьлас.
Къонача хьаьшашта кийчъяьча программанна юкъе спортацара, дешарцара, кхолламцара, Даьхенцара безам чӏоагӏбарах йола кхетаченаш, иштта экскурсеш, тайп-тайпара проекташ я. Мехка кулгалхоша къахьийгад салоӏаш йола ха берий дегашта боккха тоам хургболча тайпара дӏагӏоргйолаш.
«Къаьстта терко е еза Токмакски кхалера, Запорожски областера вай мехка ха яккха доагӏача берашта. Чӏоагӏа раьза долаш тӏаэцаргда вай республике Брянски, Липецки областара бераш а. Мехкашта юкъера бувзам, барт, безам чӏоагӏбеш дола беркате гӏулакх да из. Вӏалла а царна дицлургдоацача тайпара хила деза вай мехкарча хозача моттигашка цар салаӏар», - белгалдир Мехкадас.
Республикан Кулгалхочо теркалдир къонача россиянашта юкъе цхьоагӏо оттаеш гӏулакх из долга. Керда новкъостий корабоагӏаргба берашта, дуккхача шерашка дагалаттаргда царна укхаза ха яккхар, хьалхагӏа шоашта ца яйна тамашийна йола моттигаш йовзар.
