«Кхоллача суртаца ший юхь гойтар» яха кхетаче дӏаяхьа гулбелар Магасе
«Кхоллача суртаца ший юхь гойтар» яха кхетаче дӏахьош хилар Магасерча кагирхой цхьанкхетарий Цӏагӏа. Из хоам «Сердалога» бера цу моттигера.
«Ший тайпара низ» яхача вахара оагӏонцарча проектага гӏолла дӏахьош бар из болх. Кхетаче хетаяь яр хӏаман сурт, кеп кхоллара, таханарча кхоллама оагӏонцарча гӏулакхашта. Спикер волча Цӏечой Исроапила гулбеннарашта дийцар таханарча вахаре дизайн малагӏа моттиг дӏалоацаш я, кагирхошта малагӏа аьттув луш ба из оагӏув. Цу лостамца дувзаденнараш дайзар къонабарашта.
Таьрахьашца хоттаденнарашка гӏолла, бесашца, иштта кхыдарашцара болх мишта дӏабахьа беза белгалдир цига. Цу оагӏонца къахьега ловчарна эшаргдараш хьалхадаьхар спикера», - дийцар тхога цу моттигера.
«Таханарча вахаре дизайн яхар лоархӏаме, йоккха моттиг дӏалоацаш хиларга хьежжа, цу лекцех боккха пайда баьлар ладувгӏархошта. Бизнеса, реклама, вахара оагӏонашка накъадаргдолаш дар из деррига. Шоай кхоллама никъ дикка боаржабе аьттув хургба къонабарий, цига дайзачох пайда эцаш»,- белгалдир Цӏечой Исроапила.
