«Эбарга-Юрта унахой шоллагӏча оагӏонца дарба дӏахьош ба. 20 сага ӏобувша моттигаш я цига, таханарча ханага хьежжа кхоачам болаш болх дӏабихьаб. 2022-ча шера «Дӏаьха, кадай вахар» яхача къаман проектага гӏолла 107 лора эшаш дола гӏирсаш оттадир цига; 112, 8 млн ахча дар цу гӏулакха лаьрхӏа хьакъоастадаьр. Пхе шера 30 эзар совгӏа унахой чакхбаьннаб цига, дегӏа могашал меттаоттаеш. Укх тӏехьарча шин шера 250 тӏема моттигера ветеранаш, СВО доакъашхой, цар цӏагӏара нах хиннаб цига ха йоаккхаш. Физиотерапи, хоттанца дарба дар, лазеротерапи, дарбан физкультура, массаж, дегӏа маьхий увттадеш дарба дар да цу чу унахошта лаьрхӏа. Хӏаьта СВО доакъашхошта лаьрхӏа эггара толашагӏа йола палаташ я къоастаяь. Вай мехкадас Келаматанаькъан Махьмуд-ӏаьлас къамаьл дир унахошца, царна эшар, дезар фуд техкар. Хӏара унахочун терко яр, цун хьалага хьежжа, ший тайпара хила дезилга белгалдир республикан Кулгалхочо», - дийцар «Сердалога» мехкадаь зарбан болх лелабераша.

Мехка массайолча кхалешкара дегӏа могашал меттаоттаярах йолча моттигий хьал боаггӏача боараме тоаде, аьнна, 2022-2026-ча шерашка хьахьожадаьр миллиард гаргга рузкъа да. Дарбанчешка 943 керда гӏирсаш эца аьттув хилар. Масала, Илдарха-Гӏалий тӏара, тахан Мехкада ваха хиннача моттиге унахошца болх дӏахьош лакха говзал йола лораш ба, керда дикагӏа бола 27 гӏирс ба лорий болх аттача боаккхаш. Дуккхача оагӏонашка гӏолла чакхбала, ма хетта шоай могашал меттаоттае хьажа аьттув ба наьха. Белгалде деза, из деррига бахархоша лакха мах оттабеш долга. Илдарха-Гӏалий тӏарча дегӏа могашал меттаоттаеча даькъе тахан дукха адам тӏалатт. Дӏадахача шерара хьал теркалдича, цига дарба деш хиннараш 10 761 саг ва, хӏаьта укх шера хьалхарча бетта цига дарба деш хиннав 4 872 унахо. Ер шу доладелча денз 95 тӏема ветеран, цар цӏагӏара нах хиннаб цига ха йоаккхаш. Мехка унахцӏенон оагӏонцара гӏулакхаш тоадара тӏехьа лоархӏаме дар вай Мехкада цу моттигашка ваха, цигара болх малагӏча боараме дӏахьош ба тохкаш хилар. Шолжа-Шахьарерча, Илдарха-Гӏалий тӏарча моттигий балхага хьожаш; вай Мехкадас теркалдир паччахьалкхен политикаца эггара лоархӏамедараш нах дарба де тӏалатташ болча моттигий хьал меттадоаладар, кхоачамбоацараш юстардахар, лакха говзал йола лораш арахецар долга. Хӏара унахочунцара къамаьл, цунга хьажар, из чакхваккхар массадола оагӏонаш теркалдеш хила деза. Дарбанче унахой тӏаийбеш болча наха хьалхашка латтараш лоархӏаме, чӏоагӏа бехктокхаме декхараш да! Таханарча ханага хьежжа йола тренажераш, лазерни, физиотерапевтически аппараташ болх ца байташ латтийта йиш яц – из чӏоагӏа харцахьа да! Хӏаьта болх дӏахьош бола лораш тӏехдика кийчо яь, лакха говзал йолаш хила беза. Моллагӏча дарбанчен болх боаггӏача боараме, дика дӏабодаш хилар каьхаташцарча гӏулакхех, цар тӏа деррига нийса хиларах, эшаш мел бола кхоачам хиларах латташ дац, керттердар – наха дарба хилар, уж раьза хилар, цар хьал аттачахьа дерзадар да.

Къаьстта терко еш дийцар вай Мехкадас тӏема операце ветеранашка, цар дезалашка хьажарах, цу наха лакха терко лоаттаярах. Дарба деш бола ха чакхъяллалца, царна мел эшар ӏалашдеш, ма хулла цар хьал меттадоаладеш, къахьега деза мехка.

Келаматанаькъан Махьмуд-Ӏаьлас белгалдир, Даьхен гӏулакха тӏема аренашка лийннарашка, цар цӏагӏарча нахага хьажар паччахьалкхен хьалхашка латта лоархӏаме декхар долга. Лорашкара, психологашкара дарба цхьаккха духьале, новкъарле йоацаш, боаггӏача боараме хила дезилга хьоахадир цо. Хӏара бӏухочун терко лоаттаяр, лорашка чакхвала, унахцӏено меттаоттае лакхача боараме гӏо дар дарбанчешка къахьегачар лоархӏаме, эггара хьалхара декхар да. Цу оагӏонцарча балха терко лоаттаеш ба тахан мехка.