Импорта хувцамашцара никъ

«ГӏалгӀай Республикан кӀалах хӏамаш ю «Промышленни технопарк» яха проект, дика майда йолаш, дакъа лоацаш я, экспорта долхача товарашца хувцамаш дара хьал дегӀадоаладеш. Санкцей хана вай дахаш хиларга а Россе экномика ше къаьстта хила гӀерташ хиларга а диллача; из майда дика оагӀув ба тахан латтача хьалашка.

Технопарка предпринимателашта могадеш да дукха дика хьалаш, бизнес дика дегӀайоалаеш дӀаяхьара уж эшаш да. Керттердар да таханарча заман эша гӏирс хилар, цо таро лу, дӀайолалуш мара йоацача компанешка дӀадодаш дар кӀезигагӀа хилийта, иштта шоайла кхыча компанешца яхьашка балара боарам лакхагӀа хилийта.

«Технопарк хьакхолларо, кӀалан гӀирсаш арахецарал совгӀа, кердадараш юкъедахара а из дика майда хилар хьагойт, цо хьаллоацаргья зӀамига, юкъера бизнес, хьакхолларгья керда балха моттигаш. Оаха лерхӀачох, технопарк къона говзанчаш, инженераш, доалахьара хӏама хьадераш, шоай хьамсара мохк дегӀабоалабеча къахьега кийча бола нах тӀаозаш йола керттера моттиг хургья», - аьлар ГӏалгӀайчен Кулгалхочо, республикан хургдолчунга диллача из проект лоархӀаме хилар белгалдеш .

Технопарка чудоагӀаш дараш:

- Лоаладара, кийчдара, лотор дара, басар хьакхара доакъош - кӀалан гӀирсаш арахецара эшаш мел дар.

- Болх бе кийчъяь моттигаш.

- Таханарча заман гӏирсаш тахкара, мишта болх бу хьажара керда технологи.

Говзал лакха йола инженераш, иштта 3D кепаш а проекташ а кхолларгйола низаш.

- Къонача проекташта, зӀамигача компанешта йола моттиг.

Хӏаний из проект ГӏалгӀайченна иштта лоархӀаме ?

«ГӏалгӀай республикан кӀалан гӀирсаш дара йола Промышленни технопарк» яха проект кхоачашъяр боккха лерхӀам болаш да, республиканна вахара-экономически дегӀаахара:

- ЗӀамига, юкъера бизнес хьаллоацача.

Технопарко хьакхолл дика хьалаш; зӀамига, юкъера предприятеш дегӀакхувлара, уж керттера я моллагӀча республикан экономиканна. Таханарча заман гӏирсаш хиларо, говзал лакха йолча болхлошта, иштта дегӀаенача инфраструктуранна таро лургья, дика яхьебовла кхыча компанешца, шоай хӏама дохкара даькъ тӀа.

- Кӏалан гӀирсаш деча промышленноста говзал Ӏомаяр. Из, цӀаьхха, хержа никъ бац. Кӏала - ца хилча даргдоацаш, эшаш йола бийдал я, промышленноста дукхача даькъ тӀа лелаеш а я. ГӏалгӀайче кӀалах хӀамаш ю промышленность дегӀаяро таро лургья, цу даькъ тӏа республикан ший никъ хьалаца, иштта импорта хувцамашта юкъе дакъа дахьаргда.

- Проект кхоачашъяро таро лу, керда балха моттигаш хьакхолла, технопарке санна кхыча балха даькъ тӀа а. Цо ший аргӀагӏа хьатӀабоагӀа пайда лакхбергба; бахархой, республикан вахара-экономически хьал а тоадергда.

- Проект дика кхоачашъяро тӀахьехаргба инвестораш; Россера санна, арахьара а. Таханарча заман, пайда луш йола промышленни моттиг хьакхолларо керда инвестораш юкъебоалабергба мехка, цо таро лургья мохк дӀахо дегӀакхувлара.

ГӏалгӀайче кердадараш кхоллара экономикан наькъ тӀа

Промышленни кӀалан гӀирсаш ду технопарк ГӏалгӀайче хьакхоллар - из духхьал керда хьалъяь гӀишло хинна Ӏац. Из лоархӀаме гӀа ба, таханарча заман, экономикан кердадарашта лаьрхӀа бола.