Ӏилманца, спорте, юкъарлон балхашка, къахьегама моттигашка лакха толамаш доахаш, вай республика хозача оагӀорахьара дӀайовзийташ хьабоагӀа бахархой. Россе массадола къамаш санна, боккхача мехка бахархошта юкъера барт, бувзам, цхьоагӀо белгалдеш дола, эшача моттиге Даьхен гӀулакха ураотта кийча хилар гойташ дола Ди дездеш да вай. Иштта дола масалаш истореца дукха да. Ма дарра дувца эттача, бӀарчча библиотека тоъаргьяцар аьнна хет. ТӀема операци латтача моттигашкарча сюжеташа, хоамаша хьагойт вайна деррига… Лакха майрал, денал, яхь йолаш, шоашта хьалхашкара декхараш дизза кхоачашдеш, тешаме новкъостий болаш хьабоагӀа гӀалгӀай къаман къонгаш.

Россе турпала седкъий луш белгалбаьб цхьаццабараш. Тайп-тайпарча къамий нах ба тахан НАТО низ юхатохаш, къамаш къестадеш болча моастагӀашта духьаллаттараш. Россе къамаш шоайла тӀаотташ, барт, бувзам болаш хиларо чӀоагӀбу Россе низ. Малхбузен мехкашта моттар, Россе къамаш декъаденна дӀа-хьа даргда, бакъда тахан Россе бахархой барт кхы а чӀоагӀагӀа хулаш латтилга гу царна. Еригача Россе Къаман боахама, экономикан хьал а дикка тоалуш айденнад, чуэцаш дола ялат, беркат хӀара денна лакхлуш латт. Кхоачамбоацараш а да, бакъда, толамаш дола моттигаш теркалъе эттача, цар зӀамагӀа дола дакъа дӀалоац.

Тикашка, базар тӀа гӀолла Ӏоволавелча; гуш да, вай мехка хьабаь кхача хӀара денна дукхагӀа хулаш латтилга. ГӀалгӀай республикан бахархошта геттара лоархӀаме да, тхьовра денз чӀоагӀдаь хьаоттадаь Ӏадаташ, оамалаш, культура лораеш бахар. Россе, дерригача дунен къамашта юкъе вай довзийташ дола лоархӀамедараш дӀахо а чӀоагӀдеш, лорадеш дӀадаха деза. Сагах саг веш дола, хозача оагӀорахьа хьа юхь дӀахьокха гӀулакхаш, Ӏадаташ да вай дувцараш.

Къаман цхьоагӀон Ди дездаро бахархошта хьагойт, малагӀча гӀулакхашта тӀехьа вай котдаьннад, малагӀа моттиг эшаеннай. Къахьегарах, ший декхараш бехктокхаме кхоачашдарах, хӀара ди цхьа пайда беш дӀадахьарах латт Даьхенцара безам. Цу оагӀоно хьагойт деррига! Хьакъалах бизза, къахьегара тӀера бола кӀаьнкаш, йиӀигаш вай кхебаро, тӀехье ший хӀама лораде, хам бе Ӏомаяро дӀалоац керттера дакъа. Шеко яц, де дезараш, кхоачашде эшараш дукха да!

Боккхача мехка хьал хӀара денна тоадергдола наькъаш кхоллаш, лакхача толамашка кхача гӀерташ, кердадараш юкъелоацаш, къахьега деза вай массахана. Россе бахархой иразе, паргӀата, машарца бахаргболаш, кхоачашде дезараш дукха да. ХӀаьта вӀаший барт, бувзам хилча; хало йоацаш дӀабахьа йиш я доккхача дикашка бода бӀаьха никъ. Вай тахан хьакхеллар, кхоана бӀаргагургда; цудухьа, лакхача толамашка кхача гӀерташ, хила деза вай даим. Россе бахархой барт бола цхьа тоаба я… Ишттача нигатаца къахьеге, дикка гаьнадаргда вай, из тешаме да!