Бӏухошта хьалхашка латта декхараш чоалхане да - сигале «цӏенъяр», вай оагӏув моастагӏчун дронех лораяр. Бакъда керда тӏема дакъа вӏашагӏдоллаш, технически кхоачам эшаш ба.

«Бӏухочо яхачох, из болх лерттӏа дӏабахьара эшаш я генератораш, аккумулятор, ток лоаттаеш йола аппараташ, сихача бувзаме валара рацеш, сиха, тешшаме дӏалачкъара кӏийле. Халкъа фронто из дехар сиха тӏаийцар. Оаха кхетаду, хьалхарча тӏема мугӏарашка латтар – из эггара лакхагӏа мах бола хьал да, цудухьа цига эшача хӏаманца кхоачам бе лаьрхӏар лоаццача хана. Вай бӏухошта из мухь дӏабахьийтаб, хӏанз дисар керттердар да- тӏема декхараш кхоачашдар»,- аьлар «Сердало» газетага президентски болама викалаша.

«Халкъа фронт. Деррига Коталонна!» яхача моттигерча боккхача гуллама чудоагӏаш, кердача батальона хьалхашка нийслуш дола хаттараш кхоачашдара оарцагӏдаьлар боахамаш, къахьегама тоабаш, республикан юкъарлон моттигаш.

Новкъостал дера массайолча оагӏорахьара, вай бӏухошта эшаш дола хьалаш ӏалашдеш. Россе Почта коллективаша, Гӏалгӏайче гӏолла йолча почтай болхлой профсоюзаша лоархӏаме декхар шоашта тӏаийцар. Цар ӏалашдир боккха низ бола генератораш, блиндажаш яра, иштта цахаддаш электроника ток лоаттаяра эшаш дола гӏирсаш а вӏаштӏехьадаьхар.

Гӏалгӏайче гӏолла йолча Россе ФСБ Урхаллен болхлоша гулдир дукха кхачан даараш. Иштта шийгара доккха дакъа юкъедера «Тӏема вошал» яхача Варненски отделене. Ветеранашта дика ховш да мел чӏоагӏа эшаш да тӏом боацача моттигаша бӏухой хьаллацар, цудухьа царна  эшаш бола гӏирс бахьийтар.

Къилбаседа Кавказа федеральни куран тӏагӏолла йолча Росстата Урхаллено ший аргӏагӏа хӏама хьуладеш дола цхаралаш делар, цар новкъостал дергда кердача батальона техника моастагӏчун бӏаргах лорае.

«Тӏема хьалхарча мугӏарашка латта бӏун керда дакъа хьакхоллаш хилча, лоархӏаме да хӏара хӏама, кхыметтел гон а эшаш хиларгара генераторга кхаччалца. Мехкахой кийча ба моллагӏча хана накъабаха. Тахан вайна гу тамашийна цхьоагӏо хилар- вай юкъарло болх беш я цхьа маьже санна»,- аьлар Гӏалгӏай республикан Халкъа фронта штабе.

Ший ханнахьа блиндаж йолча хьакхаьча хӏара генератор, эфире араяьнна хӏара раци, бӏухочун бебоалла хӏара гӏирс - уж тӏема декхар кхоачашдара эшаш дола хьалаш да. Ханнахьа мехкахоша хьаллоацаш хиларо таро лу бӏухошта, кхыйола вахара халонаш дага а ца йоахкаш, шоай декхар кхоачашде.

Цига, тӏема мугӏарашка, дац лоадам боацараш, е сиха доаца гӏулакхаш. Нагахьа санна новкъостал сиха хьакхаьча хилча - из да моттиг чӏоагӏъяь хилар, бувзам болх беш хилар; тӏаккха, моастагӏчун дрон а, мичахьа я хайна, юхатохаргья.

Тахан вай юкъарлон цхьоагӏо хилар - тӏема мугӏарашка, хӏара сахьат массаза дала шоай вахар кхо ца деш, садехка моастагӏчоа духьаллаттарашта йола тешшаме чӏоагӏо я. Вай царца цхьана гаргайоалаю вай юкъара машаре кхоане.