«Гулбеннараша дукхагӀа терко тӀайохийташ хиннар дар гогвзанча хьехамаш тайп-тайпарча оагӀорахьа дӀахьош хилар. Говзанча хьехам белар кӀаьдача басарашца Марзбиканаькъан Белас, Гӏайтакханаькъан Аминас, доакъашхошта довзийташ цу даькъ тӀара балха хьалаш, техника, иштта царна новкъостал деш, шоай кхоллама таронаш хьаелла. Кхы кӀезигагӀа терко тӀайодаш дацар Элмарзанаькъан Залинас дӀабихьа говзанча хьехам а, цо гойтар скульптура. Цун кулгалца хьаьший хьежар скульптура даькъ тӀа шоашта фу хов, боалозах хӀамаш хьакхоллаш», - аьлар «Сердало» газетага Паччахьалкхен ИЗО музея зарбан болх лелабераша.

Тхога хоам баьчо яхачох, тӀехьара тӀа тоайир «Искусствай бийса» Илдарха-ГӀалан берий искусствай ишкола начӀал долча къонабараша, цар хоза дӀааьлар гӀалгӀай иллеш, гулбеннарий самукъадоаккхаш.

Хӏара кхоллам ший тайпара дегах чакхбоалаш бар, гулбеннарий уйлаш дукха бӀаьшераш хьалха хиннача ханашка дӀакхухьаш. Гулбеннараша тӀаийцар къона артисташ, дукха тӀоараш детташ - царна из доккха совгӀат дар.

Иштта теркал ца еш йитанзар, къонача иллиалархочун Харсенаькъан Дейсе яь хинна кийчо. Цун илли геттара чӀоагӀа дезаделар ладувгӏаш хиннарашта.

Хӏара цун дош, оаз, юхь хувцаялар ший тайпара наьха терко тӀаозаш дар; из ма дарра дувзаденна дар цаӀ долча исбахьален кхайкаралца.

Кагийбараша цу юкъе дакъа лацаро геттара хозбир из гуллам, цар гойтар ГӏалгӀайчен къаман культуран Ӏадатий оагӀонаш, цар лерхӀам, хозал.

Иштта нийсделар дика гӀулакхаш, уж хиларах сайре а ший тайпара хоза дӀаяхьа таро хилар.

Хьалхара дика дар Чопанаькъан Хьанифа цига ена хилар, из массахана музея хьаьша я. Цо шийца дера ше морг кхы доаца совгӀат: ший кулгашца хьаяь гӀалгӀай гӀалашта тара кеп йола торт. Из кулинарни кхоллам, чам болаш хинна а ца Ӏеш, ший тайпара белгало йолаш бар.

Дукха дахаргда цига хиннарий дегашка из цӀай, иштта ГӏалгӀай паччахьалкхен университета студентий гойтамаш а, уж баьхкабар вай Россера, Индера. Къона артисташ арабаьлар, къаман сийрда гӀирсаш дувхаш, гулбеннарашта хьалхашка, цо ший оагӀорахьа тоадир цӀайна хьал, культурашта юкъера къамаьл.

Студенташа гойтар массехк халхар, духхьал зал сомайоаккхаш. Цар гойтача номерах дог айденна бар хьожаш хиннараш. Хӏара халхар зӀамига истори дар, цо хьаеллар индийски культура, Ӏадаташ. Цох хилар халкъашта юкъерча доттагӀала дийна къамаьл.

«Искусствай бийса» паччахьалкхен исбахьален музее боккъонца дола халкъашта юкъерча доттагӀала, культура цӀай хинна дӀаэттар. Цо хьагойтар искусстваш боарам боацаш хилар, цар дегаш вӀашагӀтохаш хилар.