Мехка эггара толашагӏа лоархӏаш йолча тӏема вузе деша вагӏаш, цу оагӏонца мел эшараш чӏоагӏделар цун дегӏаца. Хьасана дика кхетадора, ПВО яхар гӏалатвала йиш йоацаш, чӏоагӏа фийла хила везаш оагӏув болга, цунга хьежжа тӏема ӏилманца лоархӏаме мел дараш шаьрдеш, тохкаш хьавоагӏар. Боккхача, лоархӏамеча наькъагара дӏадоладелар цун вахаре деррига а.

Сирийски ӏарбе Республике российски зенитчикашца лоархӏаме моттигаш лораеш, бехктокхаме гӏулакх дӏахьош лаьттар уж. Дикка белгалваьлар вай мехкахо цига. Вахара никъ хадача хана Хьасан С-400 «Триумф» дивизиона хьалха латташ вар. Эзараш нах бар цунна тӏехьалатташ хиннараш, цунга хьежжа ший декхараш лакхача боараме, бехктокхаме кхоачашдеш хила везарех вар из. Ше кулгал деча дивизиона гӏулакхаш лорадеш, гӏалатвала бокъо йоацилга дика кхетадеш, хьавоагӏар из цу наькъ тӏа.

Хӏаьта вахара никъ хадача миноте массанена дӏагойтар цо из… Тӏема исторе лоархӏаме моттиг дӏалаьца, дукха ха яхарах йицлургйоаца цӏераш я белгалъяь, цу мугӏаре латт Тӏумхой Хьасана цӏи. 2026-ча шера саькура бетта 24-25-ча бийсан хилар цун тӏеххьара тӏом. Цу бус цо дӏагойтар  тӏехьалаттараш шийна массахана шийл чӏоагӏагӏа дагабаьхкилга. Унзара бийса хилар цох! Россе герзашцарча низа Министерствон моттигашта лакхера чуетта волавелар моастагӏа цу бийсан. Итташ нах чубоацаш гӏетташ дола гӏирсаш лелар, сигала гӏолла кхесташ. Цу кхерама кӏалха латтар С-400 зенитно-ракетни дивизион.

«Триумфа» кулгал деш волча Хьасана дика кхетадора эзараш болча шоай цӏагӏа багӏача наьха вахара кхерам боссаш хӏама из долга.  Даггара духьале еш бар уж, нах бахача доазон уж тӏа ца кхачийта гӏерташ, бакъда унзара морх такхоачаш латтар. Дивизион латтача моттиге хьожаяь чутехар моастагӏчо, хьал геттара халача дийрзар… Геттара сиха кхаста везаш дар гӏулакх. Шоаш латтача моттиге хьежаеш чуеттилга хайна, Хьасан бӏухой кӏалхара бовргбола хӏама де дезаш вар.

Цу моттигера нах арабоахача операцена кулгал деш вар из. Хӏара бӏухо, оператор, машин лоаллаш вар цу кхерамеча доазон тӏара арабовлара тӏахьожам беш лаьттар деналах визза хинна вай мехкахо кӏура, дема, туржаӏа юкъе. Берригаш кӏалхарабаьнначул тӏехьагӏа ше дӏахьулавала хьежар подполковник, бакъда ха йисаяцар.

Шозлагӏа чутехар… тӏема декхараш кхоачашдеш латташ, вахар хаьдар вай мехкахочун. Иштта деналах, майралах визза хинна бӏухо дӏавалар боккха эшам бар цу моттига, хӏаьта гӏалгӏай къаманна доккха халахетар дар эздий воӏ къастар. Хьалхарчарца аравала йиш йолаш вар из, бакъда берригаш дӏабахийта мара ший уйла е оттанзар. Унзара, бирса ера саькура беттацара из бийса. Гӏалгӏай мехка, ерригача Россе деналах визза хиннача эпсара цӏи йовзаш, лоархӏаш хургья.

Бехктокхаме ший декхараш кхоачашдеш хиннача эпсарах баьлар мохк; хьамсара, дика воӏ воацаш дисар гӏалгӏай къам. Атта доаца гӏулакх шийна хьатӏаийцарех вар из, хӏетта кхийнача хана. Цӏаккха а атта никъ лехаш хиннавацар Хьасан, бера хана денз белгала волаш, хьалкхийра из ший цӏагӏа. Эздий воӏ хургва цох кхийна ваьлча, оалийташ вар шийх бера хана денз.

«Иштта воӏ вай хиларах доаккхал ду, дега чӏоагӏа хала да цун вахара никъ хадар,- аьлар вай мехкадас Келаматанаькъан Махьмуд-Ӏаьлас, РФ Турпала цӏи цунна яларах дувцаш. – Цӏагӏа цунга хьежаш, сатувсаш багӏаш цӏен- нана, диъ бер дар. Йоккхагӏа йолча йиӏига тахан 13 шу дизад, зӏамагӏа волча кӏаьнка диъ шу даьннад. Цхьаккха хӏама ца эшийташ, царна терко лоаттаяр вай декхар да. Мехка исторе массахана йовзаш хургья вай мехкахочун Хьасана цӏи.

Из пхелагӏа ва Россе Турпала цӏи еннача вай мехкахоех. Цул хьалха из цӏи елар подполковника Боканаькъан Къурейша Мустафайна, капитана Хамхой Ярагӏе Адама, капитана Хьоашаланаькъан Адама Султана. Къаьстта ала лов сона тахан вай цхьаькха Турпалхочох – Хьоашаланаькъан Ювсапа Султанах. Вай къонабарашта дийна дола масал долаш къахьегаш ва из тӏема аренашка».

Бокъонца бола турпалаш гаьна бац, уж вайна юкъе, уллув бахаш ба… 36 шу даьнна мара веце а, кӏоарга хьаькъал долаш, бера хана денз майрал, денал, яхь яхача дешай мах бавзаш хьалкхийнавар Хьасан. Хӏама геттара телхача миноте, дукха уйла ца еш, шийна гонахьарбараш кӏалхарбаха хьежар из. Шийна тӏехьалаьттача бӏухошта да хинна лаьтта саг вар из. Къахетаме, эггара хьалха кхыбарий уйла еш хилар-м цох бера хана денз доаллар.

Иштта оамал йолаш саг хиннав из массахана. 36 шу яхар саг ший вахарера гӏулакхаш тоаде волалу, хьаькъала чӏоагӏлу, де дезачун бист боаккха ха я. Дукха дар Хьасана кхоачашде лаьрхӏа хинна гӏулакхаш. Ший даь, наьна дог хьаста ловра цунна эггара хьалха, цар гӏулакхаш аттача доахаш, ший диъ бера уйла йора, уж дерригаш эздий нах беш ураоттадаь нийсача, беркате хургболча наькъ тӏа даха дезар. Дувцилга доацаш хала да иштта хьамсара воӏ дӏавалар даьна, нанна, из цӏенах кхетарга сатувсаш, дуӏаш деш даьгӏача берашта, цӏен-нанна.

Эздий воӏ, дика да, хьамсара цӏен-да къаьста бисар уж нах… Хӏама тоалуш латт аьнна хетача хана, хаьдар цун вахара никъ. Доккхача дикашка кхача гӏерташ вар Хьасан, хьинар долаш, къахьега ловш саг вар. Дуккхача къонабарашта масал долаш ваьхавар из. Хана йӏоахалца бицлуц иштта денал долаш лаьтта къаман къонгаш, боккхача мехка исторе, дошоца кхаьла, яха юсаргья цар цӏераш! Ишколашка дӏакхухьача кхетаченашка, митингашка, дезала юкъерча сайренашка массахана хьоахаеш хургья турпала цӏи. Иштта яхь йолаш хиннача Хьасана дезал а цун ларах ураоттаргба, аьнна, хет…

Иразе, беркате хилда цар денош, ала лов царга тахан! Подполковник хиннача Тӏумхой Хьасана цӏи йовзаш, лоархӏаш хургья къонабарашта юкъе, тӏехьенгара тӏехьенга кхоачаш дахаргда из истори. Дувцилга а доацаш, хала да-кх дега, къаман дикача къонахчун вахара никъ иштта къона волаш хадар… Цо шийна тӏехьа дита дикаш дебалда, къаман накъабоалаш, боккха пайда боаржабеш хилба цун дезал!