«Къаман фронт. Деррига а Котало бахьан!» яхача ерригача Россе дӏахьош долча гӏулакхага гӏолла, дукха хӏамаш гулйир бӏухошта лаьрхӏа. Дега боккха тоам беш хӏама да из! Тахан шоай цӏенах, мехках хьегаш бола къонгаш ба Даьхен гӏулакха арабаьнна латтараш. Вай мехкарча бӏухой гаргарча наха ховш да, каст-каста вай салтий болча тхо ухаш долга. Бӏухоша шоаш блгалдечох, цӏагӏара дена моллагӏа хӏама царна дега гарга, боча да. Цӏагӏарчарна шоаш дагабоахкилга, шоаех дог лазилга хар тӏема аренашка леларашта лоархӏаме да. Духхьал хӏамаш ена ца ӏеш, даьй мехкара йӏовхал ений оаха цар дегашта. «Аьрзи» батальона доакъашхой лакхача боараме шоай декхараш кхоачашдеш, вай мохк дикача оагӏорахьара дӏабовзийташ латт цу моттигашка», - дийцар «Сердалога» Къаман фронта доакъашхоша.

Президентски болама хьинардараша къамаьл дир хьалхалаттарашца, массаболча бӏухошца царна эшар, дезар фуд тохкаш. СВО доакъашхой болча бихьа хӏанзарча Къаман фронта никъ ший тайпара хилар…

Хӏамаш дӏаяларал совгӏа, СВО моттигашка хӏамаш лоаттаераш белгалбеш йола кхетаче дӏайихьар «Аьрзи» батальонаца. Хьалха латтача Котанаькъан Ахьмада («Хафиз» оалаш волча) къаьстта белгалдир цу юкъарча гӏулакхе гӏо деш лелараша къахьегар. Хьинаре, бехктокхаме къахьега кийча болаш хьабахкарах, доакъашхошта майдилгаш елар. Хьинардараша белгалдечох эзараш вай мехкара нах чулоацаш дола гӏулакх дар из.

Цу юкъе ба бизнесменаш, бахархой, къоаной, дешархой, студенташ - штабе тӏемахошта лаьрхӏа хӏамаш хьакхухьаш мел бараш, бӏухой дог ураоттадеш каьхаташ яздераш.

«Уж майдилгаш дӏаекъача хана, кхы а чӏоагӏагӏа кхетадора оаха, царех хӏараяр оагӏув хьаллоацаш болча мехкахошта йолга. Массане а цхьана дӏахьош дола хӏама да теркалдер», - дийцар цига баха хиннараша.

Тӏема эпсар, бӏухой чӏоагӏа баркал оалаш бар мехкахошта. Даь дика цӏаккха а довргдац! Гӏалгӏай къаман нах массахана хиннаб вӏаший тӏаотташ, оагӏув хьаллаца кийча болаш.Тхьоврача ханашкара денз, Россе турпалаш болаш, хьабаьхкаб вай деналах бизза хинна дай а, шоаех эздий цӏи йоаккхийташ. Хьалхарча дунен тӏема ханашка,

Сийлахь-боккха Даьймехка тӏом лаьттача шерашка моастагӏий, вӏалла къайла а ца хьош, кхераш хинна бӏухой ба «Акхача дивизен» юкъе хиннараш. Массахана Даьхен хӏама лораде ураотташ, шоаш дӏакхаьчача белггала лар юташ, хьабаьхкаб вай майра даьй, иштта бола никъ ба таханарча къонгаша дӏахьор а.

Россе исторена гӏалгӏай къаман къонгий-турпалий цӏераш дика йовзаш я. «Аьрзи» яхача батальона бӏухой деналца, яхь хиларца, майралца шоай декхараш токхаш латт тахан Украине.

Тӏемахошта, укхаза цӏагӏа багӏарашта, царга хьежарашта юкъе даиман бувзам хила беза. Из бувзам лоаттабар мел лоархӏаме да кхетаду вай массане. Мехкахоша дега безамца, йӏовхалца кийчъяь ӏояхьийтача хӏамаша бӏухой дегашта боккха тоам бу. Царна тӏехьа дуӏаш деш, диканга сатувсаш, могаш, маьрша болаш цӏенах кхеталба, яхаш, да вай дерригаш.

Таханарча халача хана, доккха декхараш токхаш латта нах ба уж, цӏен йӏовхалах хьагаш, цудухьа чӏоагӏа лоархӏаме да массахана царца бувзаме хилар, цар дог ураоттаргдола къамаьл дар.

Къаман истори яхар доккха хӏама да! Хӏаьта гӏалгӏай къаман истореца яха йисай дуккхача деналах бизза хиннача къонгий цӏераш. «Хафиза» Къаман фронта доакъашхошта еннача майдилгаша хьагойт, Коталонга бода никъ берригаш цхьанкхеташ хиларца чӏоагӏа болга.

Тахан тӏема аренашка лелараш, цӏагӏара цар оагӏув хьаллаца хьожараш, гӏо де арбаьннараш – берригаш а сийрдача вахарга, доккхача дикашка сатувсаш ба. Хӏаьта вай вӏаший тӏера хиларо дуккхача хӏаман тӏехьа хьалхадоах вай, низах чӏоагӏду!