Белгалдир, Ерригроссийски къонача профсоюзий кулгалхой яхьо хьайийллар, Гӏалгӏайчен хьинар долча наха шоай балха даькъ тӏа лакхбалара йола керда таронаш, доакъашхоша гойтар шоаш тоабашца болх бе ховш хилар, къахьегаш болча кагирхой хьашташ лорадара тӏехьа хилар.

Хьалхара «Машук» яха дешара программа дика накъаяьлар хургбола, профессиональни болх дӏахьоргбола болхлой кийчбара. Из чӏоагӏа дика хеташ хьаллаьцар юкъарлоно.

Дегӏаахара кердача наькъах дувцаш, белгалде деза, 2025 шера Свердловски областе профсоюзаша мехкашта юкъерча боараме бартчӏоагӏам баь хилар. Цо таро елар Гӏалгӏайчен «ӏарамхи» оалача санаторе дика салаӏа ерригача Россера баьхкача профсоюзий доакъашхошта.

«ӏарамхи» санатори чуйоагӏаш я Россе профкурорташта, из хьаллоац «Гӏалгӏай Республикан профсоюзий Цхьанкхетаро», цул совгӏа дикка юкъебоалаш боагӏа профсоюза тоабашта дукхагӏа бола нах.

Котало яккхара 80 шу дизара чудоагӏаш, Гӏалгӏайчен профсоюзаша вӏашагӏъеллар кхетачений массехк оагӏув, иштта лоархӏаме новкъостал дир Украине дӏахьош йолча лаьрххӏача операце бӏухошта.

2025 шера юкъара даь новкъостал да ах миллион совгӏа сом, из ахча да дукхагӏча даькъе профсоюзаша хьаденнар. Уж иштта яха хилар бӏухой дезал болча, царна белггалара новкъостал дир.

«Вай толамаш - из йоккхача тоабан толам ба, из болх дӏахьош ба хьинардараш, говзанчаш, уж ба дег чура из болх безаш, къаьгга цу даькъ тӏа къахьегаш бола нах. Аз доккхал ду вайна карагӏдоалачох, вайна хьалха кхы а дукха коталонаш я. Дӏахо а иштта дог лазаш, цӏена, массане цхьана вай из болх дӏахо дӏахьоргба. Цхьана хилча вай таро хургья моллагӏа йола халонаш тӏехьайита, иштта хьакхолла чӏоагӏа, паргӏата йола юкъарло», - аьлар гӏалгӏай профсоюзий кулгалхочо Оздой Хаде.

Карарча шера вай мехка вера Российски Федераце автотранспорта, наькъий боахама профсоюзий кулгалхо Ломакин Владимир. Гӏалгӏайчен автотранспорта, наькъахой профсоюза болхлошца, Гӏалгӏайчен Минавтодора викалашца хиннача вӏашагӏкхетаре таро хилар цхьана болх лелабара тӏехьа барт бе, цу даькъ тӏара болх дӏабахьара йола оагӏонаш тахка.

Хургдолчун балха хьал тийша да профсоюзий бокъонаш дукхагӏа хиларах, цар вахара-къахьегама хьал чӏоагӏдеча даькъ тӏа дукхагӏа дакъа лоацаш хиларах. Дукхагӏа терко тӏайохийташ дар да, мехка тайп-тайпарча моттигий тоабай бувзам чӏоагӏагӏа хилийтар.

Даьха толамаш доккхий дар аьнна доацаш, Гӏалгӏайчен профсоюзашта хьалхашка латт балха говзал лакхъяра декхар, юридически оагӏув дегӏайоалаяр, къахьегамхой хьашташта терко лоаттаяра дешаш.

Шоай къахьегамца профсоюзий болхлоша хьагойт вахара хьашташца бувзабенна бехктокхам лакха хилар, иштта эггара чоалханегӏа дола хаттараш кхоачашде ховш хилар. Цар къахьег республика дегӏайоалаяра кӏоаргга лард йоллаш; хьалаш, дика таронаш нийсхон тӏехьа лелаеш.