Из деррига хургдолаш хӀама да, нагахьа ЖКХ оагӀон болхлоша шоай гӀулакх боаггӀача боараме дӀакхухьаш хилча.

ХӀаьта цу оагӀон болх цхьа кӀеззига гоалбаьлча, бӀарччача шахьаро, юрто зувш хул. Сиха хьаӀов нувхий гувнаш, вӀаштӀарадаь цӀенош гӀорадий латташ хул, цхьаннахьа турба ийккхе наькъа юкъе бӀарчча Ӏам отт.

Вай мехкарча йиъ шахьаре, юрташка бахача наха ЖКХ оагӀон болхлой къахьегам дика гуш хул. Нув хьекхараша, нувхаш дӀакхувсараша, ехар тоаераша беш бола болх мах баь варгвоацаш ба.

Цу наха тӀалаттача дукхача декхарашта юкъе да гӀишлош тоаяр, йӀовхал лоаттаяр, хий, ток хилийтар, шахьара моттигий куц эргадаккхар, ханнахьа нувхаш дӀакхахьар, иштта кхыдараш а.

Къаьстта аьхки чӀоагӀа дукха къахьега дезаш хул цу наьха. ХӀара шахьаре, юрта хӀана яц аьнна; тиша хин турбаш хувца езаш хул, лампаш хувцар, буц дӀахьакхар, наха салоӀача моттигашка лостам бар, квартираш йолча цӀеной ковнаш цӀена лоаттадар – дукха я уж кхача беза моттигаш. Иштта дер дайна лелараша телхаю моттигаш тоае еза цар. Йохаяь фонараш, гӀандаш тоаде деза; гаьнашта, зизашта доал деш къахьега деза. ВӀалла салоӀам боацаш, болх беш лел ала мегаргдолаш да цу нахах. Уйла ел, мел хотта, кегар шоашта тӀехьа бут ара тӀаьда латтача хана машинаша; хӀаьта салаӀа Ӏохувшарашта тӀехьара мел пакеташ, шушаш, каьхаташ, иштта кхыйола нувхаш дӀаяха езаш хул.

Цхьаккха хӀаман уйла еш боацараша пластиках яьча нувхий яьшкашка бетона галаш, кирпишкаш юташ йола ха я цар къахьегар… Готтига урамаш дизза нах, машинаш лелача; жагӀан гувнаш, турбаш латтача; цу дерригнена юкъе хало озаш, шоай болх чакхбоаккхаш; адама хоза, цӀена хилийта гӀерташ; лел уж нах тахан. Геттара Ӏуйран нувхаш дӀакхахьа, хаоттам мичча беса бале а лостам бе хьож уж. Наха хеталуш хул, хин турба мара йий ийккхар аьле, бакъда дӀабахьа беза болх-м из деррига юстардаккха дезарашта аттачарех бац. Хий ийккха моттиг хьаахка еза, цу чура колд араяьккха лотор деш, кхыбола болх дӀахьош бахка беза. ДӀаьха денош дезаш хул иштта къахьега. ХӀаьта, ара шелал латтача хана, уйла ел, мел хала да цу тайпара болх беш кӀоаг чу валла. БоаггӀача боараме сий де Ӏемадац вай цу балха… Иштта хила деза-кх ер аьнна хеташ, наха кхы башха теркалдац цар дер. Бакъда, духхьал цу наьха болх ца хилча, доккхий гӀулакхаш ма хетта дӀа-м гӀоргдац. Даиман из дӀадувца деза боккхийчар, кхувш латтарашка. ТӀаккха кхоана, боаггӀача боараме лоархӀаргда аьнна хет, цар хьегаш дола къа, нувхаш а кӀезигагӀа йоаржае тарлу. ХӀара саг шийна гонахьарча дунен уйла еш, лерхӀам беш хуле; урамаш, паркаш, сквераш, базараш, автобусаш сеца моттигаш массахана цӀена латтаргья. Деррига а сагагара долалу, сага лорадича, хьадаь латтар хоза, бӀарг тӀаотташ хургда массахана.