Лоаман мехка тамашийна хозал
ХӀанзалца лораяьча къаьнарча хьайро ноахалий замаех дувц
ГӏалгӀай къаман хӀара тайпан ше-ший тӀехьенга кхоачаш дита цхьацца хӀама нийслуш моттигаш хул. Цӏи хезача журналиста Майсиганаькъан Руслана цу тайпара тӀехьале я къаьнара БурокӀалхара хьайра, цун даь-дас Элбазара Ахьмада XVIII бӀаьшере хьалъяь. Из сийленг дийна тешал да, дӀаяхача ханашка баьхача наьха кулгаговзала, къахьегама оагӀонаш лелаяь хилара. Цу хана технологеш геттара хьа ца кхоачаш гаьна йолча хана, Элбазара Ахьмада хьайра, юртбоахама вахара центр яр. Цо бахархошта Ӏалашо йора хьоараца, цхьана вӏашагӏкхийте ахьара аргӀа елла, цох кхоачам беш нах бахар. Из вӀашагӀйоллара говзалга хьежача, ноахалгара ноахалга доалаш из гӀулакх къаман юкъе леладаь хилар хоалуш да.
«Дукха ха йоацаш оаха дийцар хьаьра а, тхоай музее лорадеча сурта а истори. Цхьан дийнахьа ГӏалгӀайче кхетаче йолаш венача, Российски Федераце суртанчий доакъашхочо Хоронько Игорь Борисовича йир къаьнара, таханарча дийнахьа латташ йола Бурокӏалхара хьайра. Цу тайпара вайзар цунна Элбазара Ахьмада виӀий-воӀ, цӀихеза журналист Майсиганаькъан Йоакъапа Руслан. Игорь Борисовича лаьрххӀа цунна кхеллар керда сурт, из дахьаш вера из ГӀалгӀайче, цо из делар Йоакъапа Руслана совгӀата, музее кхетаче йолаш», - аьлар «Сердало» газетага ГӏалгӀайчен паччахьалкхен исбахьален искусствон музее.
Майсиганаькъан Руслана БурокӀалхара къаьнара хьайра тайпан тӀехьале хиларал дукхагӀа я. Из рузкъан кIийле я, дакъа да цун даьша дита. Цар лоӀамо, къахьегамо вӀашагӀделлар хьамсарча мехка куц, цунца цхьана дикагӀа йовз цун таронаш, мах бараш.
Хоронько Игорь хӀанз Майсиганаькъан цӀагӀа дикагӀа йола моттиг дӀалоацаш ва. Цо хьагойт, тӀехьале - уж кхертӀой е каьхаташ хинна Ӏац, дӀаяхача ханашкара вай хьаэцаш дола дувцараш а дац уж, бӀарчча тӀехьале я, ноахалгара ноахалга кхоачаш, хьайоагӀаш йола.
Руслана из кхоллам ба начӀал долча суртанчан балха доаккхал де йиш йола, ший тайпан хьалхашка бехктокхаме хилар, ший даьй гӀулакхаш дӀахо дӀадахьар- Ӏадаташ, даьй овлаш лорадеш. Иштта дийнлу истори, из кхоачалуш дац, нах дӀабахабар аьнна, из дӀахо дӀахьош да из гӀулакх лораде кийча бараша.
«Аз доаккхал ду цу лоархӀамеча совгӏатах, иштта бовзарах Игорь Борисовича кхоллам - тамашийна дикача суртанчан.
Дег чура баркал оал аз сай берригача дезала цӀерагӀа цу мах болча совгӀатах»,-йоах Майсиганаькъан Руслана.
Тхога ГӏалгӀайчен ИЗО паччахьалкхен музее ма аллара, ший балхашца Хоронько Игорь Борисовича ма ярра хьагойт ше морг кхы йоацаш йола Гӏалгӏайчен Ӏалама хозал. Карарча хана говзанча дика болх беш ва кердача кхоллама даькъ тӀа, ГӏалгӀайчен шахьарий, юртий хозалца ювзаеннача. Цу сурташ тӀа Игорь Борисович гӀерт географе оагӀонаш хинна а ца Ӏеш, вай республикан къаьстта хьал гойта.
Суртанчас лаьрххIа терко тӀайохийт цхьацца йолча моттигашта: Кавказа лоамий дукъ тӀа латтача сердалонна; гӀалгӀай къаьнарча гӀалай, иштта таханарча гӀишлоний архитектуранна, Ӏаламца дувзаденна латтача- баьццарча довкъашкара лакхача лоамашка кхаччалца, иштта дӀаяха ханаш таханарча ханашца вӀашагӀкхеташ йолча моттигашта.
Хӏара болх художника, хьажархочунга деш дола къамаьл санна ба, цунца тӀахьехаш, хьажа вай мехкарча дукхача оагӀоний хозалга, яхаш. Ший арен сурташца Игорь Борисович гӀерт дувца, ГӏалгӀайчен тамашийна эхь-эздел, Ӏалама хозал хоттаденна хилар сага вахарца.
Цу кхоллама таронаш вай хьажархошта гургья, аргӀанара говзанчан гойтам болча хана.
Кхетаче дӀаяхьа лерхӀ ГӏалгӀайчен паччахьалкхен исбахьален искусствай музее, из цкъа хинна Ӏийнаяц цу тайпарча гIулакха дикагӀа йола искусствон майда.
