«ТолашагIа дола балхаш хьокхаш, шоай говзал гойтар вай мехкарча артисташа. Белгалде деза, иштта дIа-хьа ахаро лоалахарча мехкашта юкъера барт, бувзам чIоагIбелга», - дийцар «Сердалога» берий театра зарбан болх лелабераша.

АьдагIийче дIакхоаччаше, ГIалгIай паччахьалкхен берий театра керттера режиссёр йолча Хазанаькъан Лейлас, Россе театра болхлой Союза моттигерча оагIон хьалха латтача Ховтанаькъан Дугурхана  дакъа лоацаш, пресс-конференци дIайихьар цига.

Журналистий хаттарашта жоп луш цар белгалдир, дIахойодача хана шин мехка юкъера цу оагIонцарча балхаца дувзаденнараш тоадеш дIабахьа лерхIача балхах. Цу дийнахьа филармоне йоккхача зале «Маугли» яха спектакль гойтар цар. 

Кхетаче хьаеллаш къамаьл дир АьдагIерча культуран гIулакхех йолча Министерствон кхоллама, дешара оагIонцарча кулгалхочо Шеуджен Беллас. Мехкашта юкъера культуран оагIонцара бувзам шинна оагIонна  пайда беш хулилга белгалдир цо. ГIалгIай паччахьалкхен берий театра кулгал деча Хазанаькъан Мусайна баркал оалаш каьхат делар цига.

Гастролеш дIакхахьара болх лакхача боараме кхоачашбарах белгалвир из. Театра керттера режиссёр йола Хазанаькъан Лейлас доккха баркал аьлар иштта безаме, лакхача боараме шоаш тIаийцача культуран болхлошта. «Маугли» духхьал спектакль хинна ца Iеш, доттагIала вахара оагIонаш тахкар да, аьлар цо ший къамаьла юкъе. Вай ТЮЗо гойташ йола из спектакль массане дегашка южаш хиннай. Лакха говзал гойташ ловзар вай артисташ, гулбеннарий дегаш сомадаха гIерташ. Хьайбашта юкъе хьунагIа кхийна кIаьнк ва спектакле гойтар.

Цун вахара никъ, малхаваьлча денз, халонаш духьалъювлаш, дагадоацарех бизза хиннаб. Бакъда, вахара денош из тоIаве гIерташ дале а, Маугли, воха ца вохаш, дог майрра духьалъотташ дIаводаш ва, массане дегашта везавенна. ЗIамига а боккха а бараш хьожаш, массанена дег чу южаш спектакль хиннай из массахана.

Хьаькъал долча Балус, къахетаме йолча Багирас, говзалах дизза долча Шерхана вахарера дукха хIамаш духьалъоттийт хьажархошта. Вахар мел хала дале а, майрача, деналах визза волча кIаьнка ший моттиг хьалох, массанена хьагойт, деналах ца вохаш, яхь йолаш чакхваларца мара халонашта духьалъотталургвоацилга.

 ШоллагIча дийнахьа вай актёраша гойтар «Дегаза боабашка кIориг» яха спектакль. Зал йизза адам гулденна, боаггIача боараме дIабодаш бар болх. АьрдагIа оамал йолча боабашка кIорига вахар, духхьал ший  оамал бахьан долаш, мел халачаотт гойтар спектакле. Сага вахаре а хул-кх иштта каст-каста. Берашта лаьрхIа спектакль из яле а, боккхийбарашта езаенна я из, зал йизза гулбеннараша хьагойтар из. Спектаклеага гIолла актёраша хьахьекхар, бокъонца йола хозал юхь тIа а йоацаш, сага дег чу йолга. Дегаза боабашк  кIай гIаж хинна дIа мишта йода хьахьокхаш, чIоагIа къахьийгар лакха начIал долча актёраша.

Театра, сага юкъера бувзам массахана ший тайпара, дега дукха хIама довзийташ хьабоагIа, цудухьа лоархIаме да из никъ цахадийтар. Цхьадолча, сцена тIара актёраша хьокхача, кхы башха дац-кх аьнна цкъарчоа хеталуча хIамо дуккхачунна  тIехьа дог хьаделл, вахарера цхьаццадараш дикагIа довзийт, теркалдайт. Спектакль йистеяьнна,  залера араболхаш хиннараш зийча гуш дар, уж раьза болаш, дог айденна болга.

«Дошо кIудал» яхача АьдагIерча театра болхлоша лаьрххIа моттиг кийчъяьяр вай мехкахошта. Балхах лаьца дукха къамаьлаш деш, цхьаццадараш доашхаш, вIаший пайда эцаш, ха дIайихьар цар цхьан истола гонахьа гулбенна. Шин мехкарча культрай оагIонцарча болхлой дукха дар дувца…

Белгалде деза, иштта йола кхетаченаш къаьстта къонача болхлошта геттара чIоагIа лоархIаме йолга, хIана аьлча, Iайха леладер наьха дегашта эшилга хайча, цу балхацара безам кхы а чIоагIагIа лакхлу, чIоагIлу. Вай мехкарча, лоалахарча берий театрий болхлоша дIахо цхьана къахьегаш кхоачашде лерхIараш дукха да. Ала лов, барт, безам чIоагIбеш хилда из деррига, аьнна. Беркатеча хIаман тIехьа аьттув хилба цар , хIанз санна массане дегаш гIадкхувлаш дIахохьолба шоай сцена тIара болх.