Денал, майрал, яхь хилар
ТолашагӀа болча къонгий цӀераш йовзаш я мехка
Украинерча тӀема операцена юкъе дакъа лоацаш бола вай къаман къонгаш тахан турпалаш ба. Царех хӀаране цӀи йовзаш, лоархӀаш хила деза вай. Тахан ураотташ латтача тӀехьенна дика масал долаш, шоаех йоккха цӀи йоаккхийташ, Даьхен гӀулакха арабаьнна тӀема аренашка лела нах ба уж. Цар гойтача деналах, майралах дувцаш йола кхетаче дӀайихьар Дола-Коарча культуран цӀагӀа. Данбассерча тӀема операцена юкъе латтарашта дика бовз маьршача вахара мах.
«Тахан кхувш латтарашта чӀоагӀа лоархӀаме да дика масал довзийта нах хилар. Турпалал гойтача бӀухой вахара наькъага хьежача; царна дика хоалу къизал, дикал яхача дешай маӀанаш, цар башхало.
Даьхенах дог лазаш, яхь йолаш бола къонгаш ба тахан къонабараша масал эцаргдола дикаш доаржадераш», - дийцар «Сердалога» культуран цӀенна кулгалдеча Алерой Билала. Кхетаче дӀахьош хиннача Бохтаранаькъан Иманас гулбеннарашта довзийтар СВО бӀухой вахарах, цар тӀема никъ мел хала ба, мел доккха декхараш да вай къаман къонгашта хьалхашка латтараш.
Кхетаче дакъа лаца бийхабар тӀема операце доакъашхо вола Мудаев Мухьмад, юрта гӀулакхашка хьожаш вола Алерой Ӏиса. Мухьмад контрактага гӀолла вахав цига. ТӀема операци йолаеннача дийнахьа денз, командир волаш, тӀема моттигашта кулгал деш хьавоагӀа из.
СалаӀа, ха яккха, аьнна; цӀавенав из тахан.РФ Герзий Низашта йолча Министерствос, тӀема аренашка белгалваларах, майдилг еннай Мухьмада, иштта Жукова цӀерах йола майдилг, грамота луш белгалвир из тӀема моттигашка.
Таханарча дийнахьа Украинерча тӀема аренашка декхараш токхаш Дола-Коара 15 бӀухо ва. Даьхен гӀулакха латтилга боаггӀача боараме кхоачашдеш хиларах, белгалбаьннаб уж.
ТӀема юкъе нийслуш долча хӀамаех, тӀема никъ малагӀа хӀамаш лорадеш дӀабахьа беза дийцар цо кхетаче. Цунга моллагӀа хаттар дала, тӀема юкъера гӀулакхаш ма дарра довза аьттув бар гулбеннарий.
Мудаев Мухьмада дийцар ший тӀема никъ мичахьара, мишта дӀаболабелар. Къонахчо лораде деза хӀамаш теркалдеш, ше дӀакхаьчача моттиге дикача оагӀорахьа ше дӀавовзийта хьожаш, Даьхе яха дош ший дега боча, доккха долга дӀахайташ, хьавоагӀа из.
Даьхе езаш, цун хӀама лорадеш дӀачакхвалар хӀара сага мел лоархӀаме хила деза дийцар Мухьмада берашта. ТӀем тӀа байзача новкъостех, тайп-тайпарча моттигашка декхараш токхаш нийсденнарех дийцар цо.
Берашта хьалхадаьккхар, хӀара саг Даьхен гӀулакха латта декхарийла волга, вай мохк моастагӀех лорабе безилга, денал, яхь, мехках дог лазар яха хӀамаш керте лоаттаде дезилга.
«СВО доакъашхочо берашта дийцар вайцигара бахача бӀухой тӀема наькъах, цар гойтача турпалча гӀулакхех, - аьлар Алерой Билала. – МоллагӀча сага декхар – шийна хьалхашка латта гӀулакхаш боаггӀача боараме кхоачашдар».
Библиотека болхлоша кийчбаь хиннача гойтаме яр МагӀалбика кхалерча, моастагӀчун наькъаш тедаш лаьттача бӀухой цӀераш. Цу наьха цӀераш вай массане дегашка яха еза, тӀехьа ураоттаргбарашта дӀайовзийта а еза, турпалаш малашб царна ховргдолаш. Украинерча тӀема операце доакъашхоша тахан токхаш латтар хала, боккха никъ ба.
Мах баь варгвоацаш да тӀема аренашка цар доаккхаш дола хӀара ди.Йоккхача Россе моттигашкарча тайп-тайпарча къамех нах ба тахан, вӀаший доттагӀал чӀоагӀдаь, вай Даьхен хӀама лорадеш латтараш.
Уж ба тахан шоай вахара уйла ца еш, Даьхен хӀама хьалха оттадаьраш. Шоай къамах, шоаш бахача боккхача мехках дог лазаш бола нах ба уж! Могаш-маьрша болаш, цӀенах кхеталба вай бӀухой!
