Кхетаченна хьалха лаьттар вар Россе юртбоахама гӀулакхех йолча Министерствонна кулгалхочун  гӀонча вола Боровой Максим. Цу оагӀонцарча моттигашкара дукха къахьегамхой бар цига тӀабаьхка. Берригача мехка къаьстта шура луш дола хьайбаш доаржадарах дийцар гулбеннараша.

Шура, шурийцара маша ма хулла дукхагӀа хургдолаш кхоачашде дезарех дийцар цига. Иштта белгалдир, цу балха юкъе таьрахьашца дувзаденнараш юкъелоацаш къахьегарах, из оагӀув дикка тоабарах. Доахан детташ болча балхаца, царна лоаттадеш долча доакъарца, доал дарца дувзаденнараш доашхаш къамаьл дир кхетаче. Шура луш долча хьайбай хьал дикка тоалургдолаш, шоай гӀулакх дика довзаш, кхетадеш бола болхлой ба царна тӀахьожаш хила безараш.

ТӀехьарча шерашка шура луш долча хьайбашцара хьал дикка тоалуш, айлуш латт вай мехка. Из чӀоагӀа гӀадвугаш да. Дукхача хана денз сайца, болх ца беш лаьтта моттигаш юха дӀайолаялийта, кердадараш юкъедаьха уж тоае гӀерт мехкара кулгалхой. Тахан керда проекташ я, цу оагӀонца йоаржаеш. Дикка пайда беш хилар дӀадахача шера СоагӀапчара шура-дулх лоаттадеш йола моттиг.

Укх шера къахьийгад, Кердача Редантера шура чакхйоаккхаш йола завод болх бе йолаялийта гӀерташ. Йоккха проект йоаржаяь, МагӀалбике шура чакхйоаккхаш йола завод хьалъеш боахк тахан. ТӀехьарча заман чухьа хьадаьнна дикагӀа дола гӀирсаш оттадаь тоабергболаш ба цигара болх. Из деррига а вай республикера шурий машацара хьал дикка тоадеш да. Юртбоахама гӀулакхех йолча министерствос белгалдечох, цу оагӀонца къахьега ловш болча инвесторашта могаш дола гӀо лоаттадергда, цар оагӀув хьаллоацаш.

Инвестиционни проекташ йоаржаяра тӀехьа новкъостал дергда паччахьалкхено. Цу гӀулакхо наха болх бе керда моттигаш хилийтарал совгӀа, мехкарча ганза рузкъа лургда. Хьайбай маша шортта доаржадар бахархой хьал аттача доаккхаш хургда. Вай республикан экономически хьал дикка меттаоттадеш, беркате хувцамаш деш хургда из гӀулакх.