Кхетаче дӀаяхьа дагадехар дар ГӏалгӀайчен халкъа кхоллам Республикански цӏа. Из дӀаяхьара терко тӀаяхийтар мехка культуран юкъарлоно, из лоархӀаме хилар республикан кхоллама вахаре.

Цу тайпарча дешара юкъе дакъа лоацаш хилар республикан культуран-салоӀама моттигий кулгалхой, культуран цӏеношкара илли алара кружокий хьехьархой, иштта къона иллиалархой, шоай начӀал доаржаде ловш бола.

Дӏаболалуш мара боацача къонача начӀал дарашта Дзейтанаькъан Темарланацара кхетаче доккха совгӀат дар. Цӏихезача композиторца ӏомабаларах, цун хьехамга ладувгӏарах къонача доакъашхошта мах бола профессиональни cовгӏат хилар.

Кхоллама мухь боккха ба Дзейтанаькъан Темарлана, дукха да цун цӀихеза иллеш, уж хӀанз а, дӀа-юха эцаш, вайна дукха хозаш да радиошка, кхыча кхетаченашка, цар дог ураоттаду кхувш йоагӀача тӀехьен. Цудухьа цунца дӀадихьа хинна вӀашагӀкхетар а дика хеташ тӀаийцар гулбеннараша, начӀал долча къоначар, цар хьехамчаша.

«Дзейтанаькъан Темарлана дӀахьош хиннача говзанча хьехама программанна чудоагӀаш дар илли аларга кийчо яр, цун керттера моттигаш Ӏомаяр, вокалиста садахара хьал хьалхадаккхар, оаза низ мишта хила беза, илли дӀаоалаш дешаш къоасталуш хилар, цун техника йовзар, кхыдараш-,аьлар ГӏалгӀайчен РДНТ исбахьален кулгалхочо Абдурзаканаькъан Аьсета.- Цун кӀаьда оамал хиларо, дег чура хьехам луш хиларо таро елар дешара кхетачен хӀара доакъашхочунга из дӀакхачийта, дика хьал хьадийллар цо шийна гонахьа, геттара йоккхача терконца ладувгӏара йола таронаш а йолаш, цига бар боккъонца бола кхоллама болх».

Дзейтанаькъан Темарлан ваьв 1964 шера аьтинга бетта 22-ча дийнахьа, хозача Эккажкъонгий-Юрта. Хургволча цӀихезача мукъамхочун бера ха дӀаяхар Нохч-ГӏалгӀай АССРа Шолжа-Гӏалий тӏа, из цига дешаш хул №49 йолча ишколе. Къаьстта деша вагӀаш безам тӀабода цун иллешта а ашарашта а, цо дакъа лоац «Эдельвейс» яхача вокально-инструментальни ансамбле, цигара дӀаболалу цун боккха кхоллама никъ.

Эскарера цӀавеначул тӀехьагӀа, из деша отт культпросветучилище. 1987 шу цун вахаре лоархӀаме нийслу- из дӀакхет «Зама» яхача рок-тоабах, из цу хана Нохч-ГӏалгӀай паччахьалкхен филармоне балха даькъ тӀа керттера лоархӀаш яр. Къонача мукъамхочо сиха тӀаоз наьха терко; ший хьинарца, начӀалца, кхы цхьаькхане ца оалача тайпара иллеш ала ховш хиларца.

Дӏахо цун аргӀанара кхоллама наькъа оагӀув ювзаенна хул, ГӏалгӀай паччахьалкхен драматически театраца. Укхаза Темарлан болх беш хул ашархо санна; цул совгӀа, цо хьакхолл ший рок-тоаба «Наькъа юкъе» яха, из ерригача Кавказе гӀолла гастролаш еш лел. Цунца цхьана цо ший болх дӀахьу «Лоам» яхача центре, Россе Президента чуйоагӀаш йолча ГӏалгӀай Республикан массазарча викала фусамца ювзаенна яр из. Иштта чӀоагӀа ший болх безаш а, цун лакхаленашка кхача гӀерташ а хиларах, из деша отт Московерча паччахьалкхен культуран, искусствай университете, цо цига йоаккх эстрада отделени. Цун начӀал белгалду «Шера илли» яхача телевизионни фестивале.

2005-гӀа шу белггала дера музыканта- цо кулгалду ГӏалгӀай Республикан культурно-технически центра. Из керте латташ хьакхеллар вокально-инструментальни «Маьлха Шахьар» яха тоаба. Къаьстта йола моттиг дӀалоац цун балха даькъ тӀа хьехамча балхо, дукха къона иллиалархой, Темарлана хьаллоацаш тахан бовзаш ба, эстрада седкъий оалаш цӀи йоаккхаш, уж а иштта наха дукха безаш ба.

Дзейтанаькъан Темарлана кхоллама никъ даим дегӀабоагӀаш хиннаб, из мутӀахьа хиннав ший балха, цӀаккха кӀаьд ца луш, къахьийгад ше хержача вахара наькъ тӀа, шийна ховш дар нахаца декъаш хьавоагӀа укх дукхача шерашка. Къилбаседа Кавказа ашарий даькъ тӀара культура дегӀайоалаяра цо юкъедена дакъа мах баь варгвоацаш да.

Цо дика къахьийгар ГӏалгӀайчен культуран министр волаш, цо ше ма барра дӀабихьаб ше хержа кхоллама никъ, тайп-тайпара начӀал дегӀадоаладеш.

Керда таронаш искусстве хьайийллар актёра говзало. Театра сцена хилар артиста таронаш маьхалйоахаш. Иштта дика дакъа лаьцар цо кинематографе. Цун фильмашка массехк йовзаш йола российски проект я, царна юкъе я «Эрсий амазонкаш-2», «Оперативни псевдоним» яха дукхача серех латта детектив, иштта «Марш Турецкого» яха телепроект.

Вӏалла кӀаьд ца луча, къа ца луча сага хьисапе вахаш ва артист. Из иштта хиларах, наьха безам шийна а ший кхоллама а тӀаозаш, караийцача новкъа дӀаховодаш ва тахан мах баь варгвоаца кхоллама дакъа республикан къонача тӀехьенна луш вола артист. Нахаца Ӏимерза, начӀал долаш, даим велавенна, нах безаш хиларо дукхача наьха дегашка вужаш ваха таро еннай Темарлана - из ва дика саг, цо лу наха йӀовхал, хьалхадоаккх цӀаккха кхоачалуш доаца кхоллама хьинар хилар вайх хӀаране. Цо Ӏомаву хозадар го.