«Керттера терко тӀаяхийтар, семинар дӀахьош, кагирхошца беш болча балха, иштта царна довзийтар гӀалгӀай Ӏадаташ. Цу кхетаче доакъашхой таро хилар шоайла балха говзал екъа; цул совгӀа, этнокультура дегӀайоалаяра даькъ тӀа кердадараш лаха.

ЛоархӀаме да тахан цу тайпара кхетаченаш дӀаяхьар, гӀалгӀай къаман культурацара бувзам чӀоагӀбара, хоза гӀулакхаш диццадара. Хетаргахьа цу тайпара кхетаченаш каст-каста дӀаяхьа тарлуш я, царца республикан культуран вахар дегӀадоагӀаш а хургда. Берригача болхлоша белгалдир гӀалгӀай къаман мах бола Ӏадаташ дикагӀа дегӀадоаладара, цу тайпара болх дӀабахьа безаш хилар», - аьлар «Сердало» газетага Зурабанаькъан Ахьмада.

Цу балха даькъ тӀа керттера моттиг дӀалаьцар маӀача наха боагӀача «Юкъ ехкар» яха къаьнара гӀалгӀай Ӏадат довзийташ болча гойтамо.

Цу проекто вӀашагӀтехар Шолжен РДК кхоллама болхлой, моттигерча колледжа студенташ. Из моттиг вӀашагӀъеллаяр начӀал долча культуран шин болхлочо. «ГӏалгӀай Ӏадатий ишкола» кулгалхочо Ӏалбаканаькъан Хаважа, культуран Цӏен режиссера Малсаганаькъан Ахьмада театра цхьа дакъа гойтар, доакъашхой уйлангахьа бугаш, гӀалгӀай къаьнара хозача Ӏадатех латташ дар из.

«МаӀача наха доагӀаш» яхача Ӏадато, гӀалгӀай культуран Ӏадаташта юкъе къаьстта йола моттиг дӀалоац. Цо хьалхадоаккх кагирхой кердача вахара наькъ тӀа балар, уж кийча хилар шоай къам, дезал лорабе.

Из гойтам оттабаьраша къаьгга довзийтар къаьнара гӀалгӀай Ӏадаташ, уж юха наьха дегашка хьакхоллаш санна, хоза кийчо яь болх бар из. Цар хьийга къа зехьа довнзар – гулбеннараша шоай дегашка гӀолла чакхдаьккхар из; цун лерхӀам, кӀоаргал кхетаеш, бӀаьшерашка гӀалгӀай къамо вӀашагӀъехка оамалаш уж хиларах тарра.

Сцена тӀа баьлар ГӏалгӀай культуран цӀихеза, республике цар цӀераш дика йовзаш бола болхлой,- Малсаганаькъан Ахьмад, Барханой Заьлмаха, Бантаевгӏар ТӀаус - шоаш леладеча гӀулакха говзанчаш ба уж, цар къахьегам белгалбаьб дукхача совгӀаташца, иштта уж новкъосташа лоархӀаш хиларца.

Театра актёра Балханаькъан Мухьмада юкъедаьккхар, ше оттадаь белггалара кхоллама дакъа. Цун начӀал, балха говзал бахьан долаш, сцена тӀа йицлургйоаца кеп хьакхолла таро хилар. Доккха дакъа юкъедера из кийчо еш а, дӀахьош а Шолжа кхален культуран Цӏен болхлоша Колой Ахьмада, Маценаькъан Фаридас.

Гӏажарий-Юртарча колледжа къонача, начӀал долча Бузуртанаькъан Ясминас, Гӏулой Азамата, Гуноевгӏар Сулеймас, Маргошвили Муслима иштта гойтар шоай актёрий говзал, вай культуран хургдар тешамеча нахага кхаьча хилар.

Семинаре дукха бар мехка культуран болхлой, республикан культуран Цӏеной кулгалхой. Цига иштта хилар Шолжа кхален доал деча даькъ тӏарча администраце кулгалхо Татенаькъан Ӏийса, Шолжа кхален депутатий Кхела кулгалхо Йовлой Мухьмад.

ЛоархӀаме къамаьл деш хиннача даькъ тӀа, боккха чулоацам болаш дийцар тахан латташ долча дунен хьалашка, кагирхой дегӀабоалабара гӀалгӀай къаман Ӏадаташ леладеш, уж диц ца деш, кагирхой хургбола никъ хьалхабаккха безарах. Цу юкъе дакъа лаьцар РДНТ художественни кулгалхочо Абдурзаковгӏар Аьсета, кхетаче дӀахьош хиннача Зангенаькъан Руслана.

Ювцаш йолча кхетачене дийцар къаман Ӏадаташ леладе дезилга, таханарча культуран даькъ тӀа уж даха дезилга.

Доакъашхоша иштта белгалбир Ӏадатийи таханарча культурани цхьана дӀабахьа безача балхах. Иштта хьоахадир дешарца, искусствоца, халкъа карагӏдоалача гӀулакхашца дувзаденна дешаш, кагирхошта уж довзийта дезарах.

Кхелахоша цхьа барт болаш лаьрхӀар, ГӏалгӀайчен культуран тӀехьале дегӀайоалаяр, ноахалашта юкъера бувзам лелабар, къаман Ӏадаташ лорадар лоархӀаме хилар.