Ахкан ха яр лаьттар, геттара дӀайха ди долаш. Бака тӀера ногӀар хьадаьста, ӀотӀаваха хьаж яьккха, согахьа хьакхайкар из: «Хьахетаргахьа укх чу хӀама яц!». Цул тӀехьагӀа, лотадаь каьхат цо ӀотӀахьошшехь, боккха ала боалаш, юкъе дá ахъяьнна ийккха бак массех метр дӀаяхар… Цу чу лаьттача бензина Ӏанаро дир из хӀама, Ӏи хилча тоъам ба эккха. Тахан вай вахаре нийслуш, хозаш долча хӀамашта юкъера цхьа масал мара дац из… Газ, бензин, йоагаш, эккхаш йола моллагӀа кхыйола хӀама чӀоагӀа лоравала, фийла хила везаш я. Тахан вайна гу, бензин, газ машинашка чудувтта моттигаш эзараш нах гонахьа бахача доазан тӀа Ӏояьхкалга. Кхыйолча моттигех дӀахетта хьалъяь латт уж, вай мехка гӀолла из теркалдеш хьо волавелча. Цудухьа нахага массахана дӀадувца деза, цу моттигашка хатар хилча эггара хьалха фу де деза. Доагор долча доазон тӀа хатар хилча, ма хулла сихагӀа цигара гаьна вала веза, беррига нах дӀабига беза цун гонахьара. Сиха оарцагӀъухарашка, 112 яхача номерах телефон дӀатеха, цӀера ала дӀа-хьа баржа йиш я аьнна мел хетача моттигера адам гаьнадаккха деза. Экологех, наркоманех, иштта кхыдолча лоархӀамедарех дувцаш; даьша, ноаноша дезалашта хьалхадаха деза цӀаьхха АЗСе цӀи яьнна моттиг хуле, эггара хьалха де дезар фуд.

Телефонаца деррига хьатӀадаккха, цох репортаж е ца гӀерташ, шийна гонахьарча наьха уйла еш, ма хулла сихагӀа ведда гаьнавала веза. Вай республике иштта дола хатар хинна моттиг хилар Шолжа-Шахьаре. Массехк шу хьалха ахкан хана газ чуювтта моттиг ийккха ялх саг лозаваь реанимаце Ӏочувигар. Хьадийцачох, кхерамзлен хьал боаггӀача боараме лора ца дарах хиннадар из хатар. Иштта хилар Илдарха-ГӀалий тӀарча бензин чудувттача моттиге а. Вай массане дегашта вас еш хилар лоалахарча мехкашка дукха ха йоацаш хинна цу мугӀарера хатараш. Шахьара юстара, Махачкале илла доагор чудувтта моттиг ийккха, массехк сага вахар хаьдар, массехк саг хала човнаш хулаш лозабир. Геттара унзара сурт дар укх деношка Шолжа-Шахьарера газ чуйола бак ийккха эттар. Виъ сага вахар хаьдар, царна юкъе ши бер да, массехк лозаваь саг дарбанче улл. Ше лаьттачара массехк метр дӀаяхача газа бако нах легабеш, машинаш йоахаеш, боккха цӀера ала боаржабир шерача доазон тӀа.

Массайолча моттигашкара цу хатарий бахьан цаӀ да - кхерамзлен хьал боаггӀача боараме лора ца дар! Цу гӀулакха бехктокхаме болча болхлоша тӀахьожам лоаттабац, уж моттигаш теркалъяц ала йиш яц вай… Масала, балхарча новкъосташа дувцачох, хӀанз дукха ха йоацаш иштта йолча цхьан моттига кулгал деш хинна вахархо Наьсарерча прокуратуро, газацара кхерамзлен хьал боаггӀача боараме лорадеш дац, аьнна, бехктокхаме эзар, дикка гӀод тохаш. Прокуратуран болхлоша теркаме лаьцар, цига къахьегаш хинна нах шоай болх лерттӀа бовзаш, цу тайпарча моттиге лораде дезараш фуд ховш хиннабоацилга. Махачкале, Шолжа-Шахьаре, вай мехкарча шахьарашка иштта унзара хатараш хинначул тӀехьагӀа, кхы а чӀоагӀагӀа лакхбергба аьнна хет доагор чудувттача моттигашкара тӀахьожам, кхерамзлен хьал. Тахан паччахьалкхен, юкъарча вахара оагӀонцара боккха, лоархӀаме болх ба из. Цхьаькха хатар хиларга ца а хьежаш, деррига а ший хила дезача тайпара тоадаь дӀаоттаде деза цу моттигашта доал дераша, даиман тӀахьожам лоаттабеш хила беза цу гӀулакхах бехктокхаме бола болхлой, прокуратура. ЦӀи яла тарлуш, доагаш дола хӀама мел кхераме да кхетаде деза вай массане!