МутаӀаланаькъан Берд хьалкхийнав, цӀенача юртарча хьалашка гӀалгӀай дезале, цар шоай доалахьара боахам лелабу: коа тӀара хьайбаш, оалхазараш, иштта йоккха беш. Из а леладу, Ӏаьдала балхаш тӀа долаш да-нана дар аьнна доацаш. Шоай ялх дезалхо хьалкхеваьв цар. Берд воккхагӀа ва. Из моллагӀа кӀаьнк санна кхийнав; даьна-нанна новкъостал а цӀагӀара гӀулакхаш а деш. ЗӏамагӀа волаш, боксёрий секце ихав из. Ишкола яьккха ваьлча, профессиональни кикбоксингаца хьоашал леладе волавелар. Россе чемпиона цӀи яьккхачул тӀехьагӀа, спортацара гӀулакх Ӏодулл цо. Ший юртара йоӀ йоалаю, шийяр санна оамал йола. ГӏалгӀай паччахьалкхен университет яьккха ва из; спортфак, юрфак яьккха дипломаш а да. Бакъда Берд волалу ший доалахьара боахам лелабе. Цо ший фусам-наьнаца ахархой-фермерски боахам дӀаболабу.

ГӀазе-Коа эшаш мел дола хьалаш да доалахьара боахам лелабе, цу юкъе доккхий хьайбаш а долаш. Дукха моттиг я бежан дӀалалла, яьсса ядаш даьгӀенаш я. Ахкан замах, ара йӀовхал эттача хана, Ӏийне дӀакӀалдаьнна салаӀа йиш йолаш, гобаьккха хьу я царна. Цул совгӀа, цу юрта бахача наха хьайбайшта хица Ӏалашо яьй. Иштта Ӏаьдало а гӀо ду царна.

Карарча шера шоай боахам дегӀабоалабе ахча делар цу дезала. Хьалхарча аргӀагӀа уж лаьрхӀа ба хьайбашта доакъар Ӏалашде, зӀамига Ӏаьсий а ийца, уж хьалкхеде. Цул тӀехьагӀа цар боахаме дулха йоае йиш йолаш йоккхий сиргӀаш а хургья, уж кхаба чуоттае лаьрхӀа ба уж.

«Къона волча хана фуннагӀа а карагӀдоал», - оалаш да халкъа кица. Доал, нагахьа санна балхах кхераш ца хилча, деррига нийса дӀадоладойя, из нийса дӀадахьа ховш хуле. Тӏаккха моллагӀа а кхоачамбоацар юкъера дӀадаккха ховш хургва саг. Со теш, вай бувцача дезала фусаме из иштта хургхиларах. Царгара масал эца йиш йолаш моттиг хиларца а дувзаденна да из. Эшача новкъостал де а, хьаллаца а да-нана да цар. Цар, цкъа хьалхагӀа уйла а яь, лаьрхӀар из гӀулакх дӀадоладе, цунца шоай хургдола вахар Ӏалашде; тӀаккха лаьрхӀачунга кхачара дола бахьан да из; хӀара сахьата, хӀара денна, цунга кхача уйла хилар.