Фестивала сайре дӏайихьар; Мехкадаь Администрацера, Халкъа Гулламера, иштта кхыйолча лоархӏамеча моттигашкара къахьегамхой болаш. Уж бар мехка цӏихеза нах, къаман артисташ, Россе кинематографистий Союза доакъашхой, российски режиссёраш, актёраш, иштта моттигера а федеральни а оагӏонцара журналисташ. 

Кинофестивале болх дӏахьоча юкъа дукха хӏама дайзар таханарча кино оагӏонцара. Россера, кхыча мехкашкара балхаш дар яхье гойта оттадаьраш. Кинон дуне довзаш, шоашта ховр дӏа-хьа эцаш, кхетаченаш дӏакхихьар дакъа лоацаш хиннараша. Тайп-тайпарча оагӏонашца котбаьннарий цӏераш яьхар. Эггара дикагӏа дола кино, эггара толашагӏа бола режиссёрски болх, актёрски говзал, геттара дика оттаяь сценарий, иштта кхыдараш дар цига белгалдеш. Котбаьннарашта елар цар начӏала тешал деш йола «Дошо гӏалаш».

Гулбеннарашка къамаьл деш хилар вай мехкада Келаматанаькъан Махьмуд-ӏаьла а. Мехкадас, кинофорума лоархӏамеча хьаьшаша, кхелахоша цхьатарра белгалдир, дакъа лоацаш хиннараша гойтар боккха болх болга. Хӏара болх кӏоарга маӏан, лакха начӏал долаш, боккха чулоацам болаш оттабаь болга теркалдир цига. Белгалде деза, кино кхолларцара лерхӏам Гӏалгӏай мехка хӏара шера чӏоагӏлуш латтилга, цу хӏаманца сакъердалуш бола нах дукхагӏа болга тахан. 

Кинокультураца хӏама даржаш, хьаллоацаш долга да из мехка. Дуккха халкъаш чулоацаш яр йоккха кинокхетаче, совгӏаташ делар 20 оагӏонца къахьийгарашта. Мехкадаьгара совгӏат луш хилар «Малагӏа цӏий?» яха Бруис Максим режиссёр вола кино. «Эггара дикагӏа дола ловзара кино» яхача оагӏонца котало «Жига. Ма могга хехка » яхача кинос яьккхар (режиссёр Каленова Наталья). Ший тайпара драматурги гойташ, лакхача говзалца вӏашагӏделла дар кино. Маӏача сага роль эггара дикагӏа ловзаерех ва, аьнна, белгалвир Шакуров Сергей («Жига. Ма могга хехка»). Геттара кӏоарга говзал йолаш актёр ше волга дӏагойтар цу балхаца Сергейс.

«Эггара толашагӏа дола гӏалгӏай кино» яхача оагӏонца котало «Мехка кхел» яхача Цӏолой Элинай балхо яьккхар. Къаман ӏадаташ, истори, культура-деррига цхьана гойташ бола боккха болх бар из.

«Къилбаседа Кавказера эггара толашагӏа дола документальни кино» яхача оагӏонца котало «Гӏалгӏайчен ханаш» яхача Ботиев Цветана кинос яьккхар. Вай къаман, мехка вахарца дувзаденна лоархӏаме хӏамаш гойташ бар из кӏоарга болх.

Кинофестивало чулаьцар Россе мехкаш санна БРИКС, СНГ моттигаш. «Дошо гӏала» киноматографе хӏама, таханарча ханага хьежжа хьаоттадеш, дӏадовзийташ я массанена. Лакха начӏал долаш, говзалца къахьегачар моттиг яр из. Россе мехкашта, иштта кхыйолча моттигашта юкъера бувзам чӏоагӏбеш хилар из болх. Фестивале дакъа лоацаш мел хиннарашта, хьаьшашта, кхелахошта баркал аьлар цу гӏулакха хьалхаэттараша. 

Цхьаькха Xӏӏ-ча Халкъашта юкъерча фестивалагара кийчо хӏанз, кхы ца говш, дӏайолаергья. Белгалде деза, берригаш раьза болаш, массанена салоӏам хулаш, из болх чакхбаьннилга. Кинохлопушкан татанца дӏакъайлар фестиваль. Из болх дӏабихьар культурах, туризмах йолча министерствон хьалха латтача Лаьнанаькъан Залинас, Лаврентьева Эльвирас (сценаре автор, фестиваль дӏакъовлара гӏулакх кийчдаь режиссёр). Киноца бувзам лоаттабу еррига йоккха тоаба цхьанкхеташ йола кхетаче хилар цох; гуш дар, хӏаравар дог гӏоздаьнна волга. Массане тӏоараш детташ, баркал оалаш, вӏаший барт, безам чӏоагӏбеш; чакхъяьлар фестиваль вай гӏалгӏай лаьтта.