Наркомани яхача бӏехача зуламах дийцар Магасерча дешархошка
Магасерча № 2 йолча ишколе; наркомани яхача доккхача, бӏехача зуламах дийцар. Вайна массанена ма харра из во тахан боккха кхерам боаржаберех да. Дешархошца къамаьл де гулбеннабар хьехархой, ӏаьдала болхлой, республикерча унахцӏенон оагӏонцарча моттига болхлой.
«Наркотик яхача дохьажа сага вахар толхаделга, цу хӏамах хьокхавенна саг ший ираз доадаьрех волга белгалдир кхетаче. Къаьстта терко еш дийцар берашта, тахан кхувш латтарашта юкъе яьржа йолча электронни гӏаьленех. Из новкъа яц яха къамаьл бакъдоацилга чӏоагӏдеш хилар пехкашта, нервашта цо зе дар, иштта кхыдола доккхий лазараш сага дегӏа тӏадахар.
Полице, КДН болхлоша дикка доаржадеш дийцар цар деча зенах. Дешархошта хьалхадаьккхар, наркотикаш къайленашка гӏолла йоаржаеш, «атта» ахча даккха гӏертача сага сий доадеш, цун наха юкъера гӏулакх ийрчадоаккхаш, дикка ха такха набахта чувугаш гӏулакх долга», - дийцар «Сердалога» мэре зарбан болх лелабераша.
Иштта йолча кхетаченаша дикка пайда боаржабу кагирхошта, дешархошта юкъе. Таханарча лоархӏамеча декхарех да, кхувш латтараш воча гӏулакхех лорабар, нийсача хӏаман массахана тӏахьехаш хилар. Наркоманех юстара хила бокъонаш йовзаш, дегӏа цо малагӏа зе ду ховш хила беза къонабараш.
