Промышленностацара, рузкъанцара керда бувзамаш
Газпромбанка вице-президент волча Мельников Олегаца, Къулбихьерча «макрорегиона» кулгалхочунца Лейчинко Данилаца кхетаче хилар вай мехкадаь Келаматанаькъан Махьмуд-ӏаьлий. Тахан йоаржаеш йолча проектех, иштта дӏахо бувзам лоаттабеш кхоачашде лерхӏарех дийцар хьакимаша.
Вай мехкадас белгалдир, республикерча экономикан хьал массехк оагӏонца дикка толам болаш хилар. Къаьстта йоккха терко ю индустриальни оагӏон: кӏалах яь хӏамаш арахецаш йолча кластера болх дикка тоалуш ба мехка, иштта гӏишлон балхашца эшаш болча кхоачама гӏулакх а дикка тоалуш доагӏа. Укх шерарча лоархӏамеча гӏулакхех хургда клинкерни плитка, арахьа йотта кирпишк арахецаш йола моттиг хьаеллар. Иштта дикка тоалуш латт лоаман хий кийчдеш, дӏа-хьа ухийташ йолча заводий болх.
«Доккхий гӏулакхаш доаржадеш хилча, шортта рузкъа эш. Республикера гӏулакх дика довзаш, дуккхача шерашка хьинаре къахьега кийча бола нах тӏаозар да тхона тахан лоархӏаме», - белгалдир Келаматанаькъан Махьмуд-ӏаьлас. Газпромбанкацара бувзам чӏоагӏбар лаьрххӏа дӏахьош гӏулакх да тахан.
Рузкъан оагӏонцара боккха болх дӏахьош йола мехкара керттера институт хиларга хьежжа промышленни, иштта кхыйолча моттигий болх тоабара тӏехьа дикка аьттув боал цун. Из кхетаче вай республиканна беркате хиларах дог тийша хургда вай. Мехкарча экономикан хьал меттадоаладеш, бахархошта болх бе керда моттигаш ӏалашъеш, гӏулакх хургда цох.
