Тха газето яздаьдар 2013 шера, къонача  нейрохирургах Гӏазгиренаькъан Ӏумарах. ИРКБ хӀетта мара  балха тӀа этта воацача, травматологе отделени мара, нейрохирурги йоацача хана, цо зӀамигача бера йир тамашийна хала операци. Из дӏаволалуча хана цу тайпара моттигаш цун балха даькъ тӀа дукха нийсъелар, цу хана денз цӀихеза лор ва Гӏазгиренаькъан Ӏумар.  Республикан керттерча  дарбанче нейрохирургически отделени хьайийллача, шеко йоацаш, ховш хилар цун кертте мала оттаргва, вай нейрохирургашта юкъе дукха дика говзанчаш бале а.

Ӏумарах «Дала вайта лор ва» оал. Цудухьа, тахан а сийрдача кортоша, тешшамеча кулгаша, цаӀ йолча тоабанца хӀара дийнахьа дика къахьег цу даькъ тӀа, тамашийна балхаш деш. ГӏалгӀай Республикан унахцӀенон Министерстве дийцар цох лаьца: «Унахо кхаьчар дарбанче «наькха а букъ тIара а тIехкаш лийлха  гаргаш яьнна» хала чов йолаш. Цу тайпара лазар эггара халагӀчарех да: из хьал нийсделча, букътӀехк кагьяларал совгIа, доккхача дозалах йохаш а хул. Тӏехка гаргаш букътӀехка чухьа чуяла тарлуш а я, цо тоӀаю букътӀехка мазай юхьигаш.

Цу тайпара, цу сага дӏадоладелар лохера маьженаш ехкаялар,  болх геттара во беш  хилар.

Нейрохирургашта хьалхашка латтар  чоалхане декхар - из деррига меттаоттадар. Лакхача технологе таронаш а, иштта шоай балха говзал а юкъеяьккха, хьае езаш яр операци.

Цар  юкъебаьккхар таханарча заман дарба дара никъ.

Операци дика чакхъяьлар. ШоллагӀча дийнахьа унахо, хьал а гӀетта, лелаш вар. Иштта аьттув баьлар лакха говзал йола нейрохирургаш хиларах, цар шоай болх дика вӀашагӀбелла дӀабахьарах».