Дошоча алапашца язйир Берест Алексея ший цӏи тӏема шерашка, 1945 шера маьтсела бетта Рейхстаг яккхара доакъашхо ше хиларах тарра. 1945 шера, Берлина тӏатаӏаш операци дӏахьош хиннача тӏеххьарча деношка, эггара лоархӏаме дола Сийлахь-боккхача Даьймехка тӏема хьал нийсделар. Лейтенант А.П.Берест, сержант М.А. Егоров, иштта зӏамагӏа вола сержант М.В. Кантария; И.А. Сьянова рота автоматчикаша хьаллоацаш; ӏотӏаегӏар Рейхстага гӏишлон тӏа 150 стрелкови бӏун байракх.

Цул тӏехьагӏа из штурма байракх лаьрххӏа йола цӏи лелаеш хилар «Коталон Байракх». 1945 шера, аьтинга бетта из лаьрххӏа хьаера Москве, Коталон Параде дакъа лаца. Тахан из байракх я Российски Федераце Герзашцарча Низий Керттерча музее Сийлахь-боккхача тӏема езагӏчарех цхьа белгало санна.

Лейтенанта Береста, цун тӏема новкъосташта карагӏдаьннар исторе оагӏон тӏа дусаргда; деналах, майралах визача советски бӏухочун карагӏдаьнна сийлен гӏулакх санна.

Къаьстта йола оагӏув ший вахара чуйоалайир Алексей Прокофьевича, 1945 шера маьтсела бетта 2-ча дийнахьа, советски полковника кеп йола барзкъа дийха, цо къамаьл дир Рейхстага гарнизона бисарашца. Цун майрал, денал хилар бахьан долаш; моастагӏчун салтий вайгахьа баха вӏаштӏехьадаьлар, цу тайпара бӏаьш болча бӏухой вахар ӏоажалах кӏалхардаьккха.

Цу сийдолча бӏухочунна оттадаь сийленг латт Магӏалбика парке , 2013 шера денз. Бакъда цу белгалон истори кердача оагӏонца дегӏадера, Россе Президента Путин Владимира Амар арадаьнначул тӏехьагӏа. Карарча шера А. П. Береста Российски Федераце Турпалхо аьнна цӏи елар венначул тӏехьагӏа. Магӏалбик-Шахьара юкъарлоно, ӏаьдало лаьрхӏар турпалхочун керда цӏи малхайоаккхаш, цунца дувзаденна сийленг тоаде, ма дарра гойташ Алексей Прокофьевича карагӏдаьннар.

Кердадаьккха сийленг - из халкъо баркал оалаш хилар гуш йола белгало я. Цо хьагойт советски эпсара дег чура баркал оалаш хилар, эггара лакхагӏча боарам тӏа. Укх парке хьавоагӏача хӏара сага гуш хургда дӏаяхача ханашка наха карагӏдоалаш хиннар дицденна ха йоагӏаргцахилар, уж ханаш яхаш я адамий дегашка, ха дӏа мел йода дукхагӏа чӏоагӏлуш.

Тахан Магӏалбике А.П. Береста оттадаь сийленг - из я хӏара сага турпалхочун сий де а цун денал, майрал йовза таро луш а йола моттиг.

Сийленг хьаделлаш, дукха нах гулбелар. Магӏалбика бахархой боацаш а, цига дакъа лоацаш хилар укх деношка Гӏалгӏайче дӏахьош хиннача ХӀ-ча Халкъашта юкъерча «Дошо гӏала» яхача кинофестивала викалаш, шоашта керте РФ кинематографистий Союза кулгалхочун гӏонча, Россе халкъа артист Лаврентьев Клим, Гӏалгӏайчен Мехкадаь Администраце кулгалхо Мархенаькъан Анзор, республикан Халкъа Гуллама депутаташ, администраце викалаш, Магӏалбика администраце, шахьара кхела викалаш болаш.

Гулбеннараша зизаш даьхкар цу сийленга тӏа. Из дар А. П. Береста карагӏдаьнначун, Сийлахь-боккхача тӏема юкъе цо дена дакъа доккха хилар белгалдеш, цун сий деш хилар. Цо дӏахо а гойтаргда, вай къам Коталонга кхоачадаьча майрача бӏухошта карагӏдаьннараш, деналах ца бохаш, моастагӏчунна уж духьалъоттарах йола исторе оагӏонаш.