Цу хьало хьалхадаьккхар, кхувш йоагӀача тӀехьенна толамаш гуш хилар лоархӀаме долга, цар балаж тӀа бусаргба республикан хургдолчун мухь. Цар хӀанззе а хьайоах, шоаш кийча болга шоай Даьхе еза, боарам боацаш цунцара безам шоай хилар.

ГӏалгӀай Республикан кулгалхочо Келаматанаькъан Махьмуд-Ӏаьлас белгала ма дарра, кагирхой хьинаро, цар таронаша новкъостал дергда республика дегӀайоалае, Россе халкъашта юкъера бувзам чӀоагӀбе.

Укх деношка, фестивала хӀара хьаьшан дег чу, ший мехках доаккхал деш бола цӀера сийг лотабелар. Шоашта бакъахьа хеташ, уж баха хилар эггара хьинар эшача моттигашка. Шоашта кхадж тессар веломарафона доакъашхоша Магасера Мужеча кхаччалца баха. Цу тайпара йоккха юкъ йола моттиг дӀахьош хилар, цар белгалдаьчох, шоашта тӀехьа лар йита цар безам хилар дар, къаьстта цӀай долча дийнахьа.

Безамца наькъа баьлар уж Эка-ЧӀожа хин хьаст болчара. Экскурсе иштта дакъа лоацаш бар цу хӀаман тӀерабараш а. Царна бӀаргаяйра укхазара Ӏалама хозаленаш. Эггара белгалдоалаш хиннар дар, шоаш кхача безача моттиге уж республикан гимн локхаш хьакхачар.

Ца хьоахадеш дита йиш яц, кхувш йоагӀача тӀехьенна карагӀдоалар. Цо дикагӀа йола уйлаш кхееш латт Даьхенцара безам совбаккхара даькъ тӀа.

Е ханашца е хьалашца а диста йиш йолаш дац халкъа бакъдар: «Ӏайха дӀадийнар, чу а эцаргда Ӏа». Тахан царна карагӀдоалачунга хьежача, вай хам бе беза мехка кулгалхочун, кагирхой гӀулакхех йолча Комитета, кхыча доакъой, цар шоай мел йола таронаш кагирхой политика дегӀайоалаяра дӀалуш хиларах.

Еррига таронаш юкъейоахаш, кагирхой хьож шоай ираз лаха. Мужеча дӀахьош хиннача кхетачене, таьрахьашца дегӀаахара Академе вӀашагӀделлар хургдолчун интерактивни дакъа. Цу тайпарча хӀаманца безам барий таро яр къамаьл де «Ишкола 21» болхлошца, дешара моттигера хьалаш дикагӀа довза, цу даькъ тӀа тахан хоамий технологей говзанчаш дегӀабоагӀаш ба.

«Къаьстта дукха хара тӀера бола кагирхой керттера дакъа дӀалоацаш ба мохк дегӀабара даькъ тӀа. Баркал оал аз кагирхой уйлаш, проекташ, боламаш кхоачашдеча дакъа лоацаш мел волчунна. Оаха тхоай оагӀорахьара дӀахо а дӀахьоргба къонача начӀал дарашта керда таронаш хьаеллара, цар шоашта ховшдар кхоачашдеча новкъостал дара бола болх, дешар, спорт, кхоллам», - аьлар ше къамаьл деш ГӏалгӀай Республикан кагирхой Комитета кулгалхочо Малсаганаькъан Адама.

Кагирхой Комитето, цӀай вӀашагӀдоллаш, дика терко е лаьрхӀар къаьстта шоашкара масал гойташ болча наьха. «Бовза вайбараш!» яхача гойтама экспозицена юкъедахар ЛаьрххӀача тӀема операце доакъашхой, лорий, культуран болхлой, юкъара болх берий, бокъонаш лораерий, кхыча профессей викалий сурташ. Оаха доаккхал ду царех, тешаш а да, ГӏалгӀайче тоаенна дӀаоттаргхиларах.

Белгалдаккха дезаш да, боккъонца дог гӀоздоаккхаш яр кулгаш гӀортадарах, Ӏадсаькх кхоссарах, зӀамигача футболах дӀахьош хинна яхьаш.

Геракаш айяр маӀача наха мара доагӀаш деце а, юхе мел диса спорта тайпаш кхалнахага кхоачаш дар. Массаза санна из цӀай хоздеш хиннар бар «Кагирхой маркет» яха кулгаговзал йолча пхьарий гойтам. 10 совгӀа волча говзанчо шоаш кхелла хӀамаш гойтар.

Цу дийнахьа хьаьший а цӀай вӀашагӀделлараш а цаӀаш хинна дӀаэттар, кхоллама коталонаш яхара кийча болаш. Тхона ловра из барт ноахалашта юкъе бисар, массахана лаьрхӀачунга кхоачаш уж хилар, эшача новкъостал деш, вӀаший безаш хилар. Кагирхой Денца!