«Сборника тӀа я дегах гӀолла чакхйоалаш йола байташ, цу тӀа ший байташца Гӏазданаькъан Аьсета дувц боккхача безамца ГӏалгӀайчен хӀара вахархочун дагардар, цо хьаелл мехка хозале, иштта екъ даьй лаьттах йола уйлаш, къаман вахар. Цун байташка дег тӀара боагӀача боккхача безамца дувц наьна безамах, хестабу хьамсара гӀалгӀай мотт, цун кӀоаргал, хозал. Гӏазданаькъан Аьсета кердача книжка тӀа кхыдола лоархӀамеча гӀулакхех а язду: дагалоаттамах, къаман мах барех, ноахалий бувзамах. Хӏара кхоллам - из автора ший дешархошца дег тӀара доагӀа къамаьл да, из диза да лирически а философе а мугӀарех», - аьлар «Сердало» газетага Къаман библиотеке.

Гӏазданаькъан Аьсета поэзи ешар - из да ший белггала долча вахар чу кӀоаргга чувалар, къаман дешашца бувзам лелабар, таханарча исбахьален оазаца Ӏадаташ дувзаденна хилар. Цун байташа хьаелл дешархошта ший тайпара оагӀув - поэтессас ший дегага гӀолла гойт вахара сурт, хоалуш хул бӀаьшерен культуран тӀехьале.

Поэтессай кхоллама юкъе ший тайпара маӀанаш нийслу, уж да дӀаяхача а таханарча а ханашта юкъе нийслуш дараш. Хӏара мугӀаро вӀашагӀхотт даьй дагалоаттам, багахбувцама оагӀув - таханарча дийнахьа нийслуш дола вахарера ший тайпара хаттараш.

Из къамаьл Гӏазданаькъан Аьсета дӀахьу ший берригача кхолламца. Цига хоалуш ба хьамсарча лаьттанцара бувзам, гӀалгӀай дош кӀоаргга кхетадеш хилар, иштта дӀаяхача а таханарча а наьха дегашкара уйлаш.

«Хьона, ГӏалгӀайче!» яха сборник дӀадолалу авторгара («Дешачунга») доагӏача дешаца кхайкарал деш, ше язду дег чура доагӀаш, йоах из арадаьккхачо. Иштта дег чура йоагӀача йӀовхалца, безамца йоах цунна тӀехьайоагӀача байта тӀа а, «Хьона, ГӏалгӀайче!» яхаш я из.

Книжка чулоацам бовза йиш я цун тематически оагӀонашка хьежача: «Дай мехках дош ала…», «Наьна дог – бух боаца хьаст», «Наьна мотт – дего бувца мотт», «Къаман турпалаш – къаман сий», «Вахара наькъаш». «Къонали къоанали», «Безам - вахара са».

Книжка арадаьннад Ӏаьржа-кӀай, суртанчан Ӏагӏасанаькъан Т.Т. графически балхашца. Тӏера сурт даьд сийрда, терко тӀаозаш да из, гӀалгӀай къаман дӀаяха зама, таханардар цхьана хотташ йолча кӀоарггача маӀанца.

Гӏазданаькъан Аьсета поэзи къаман бувзам чӀоагӀбеш я, цо хьалхадоаккх, мотт - из шоайла деш дола къамаьл хинна Ӏац, из къаман белгало я, Даьхе – географе маӀан дац, из я дагалоаттама, бехктокхаме моттиг, Ӏадат - цхьаннахьа дӏатийнна латташ дола хӀама дац, из дийна хьинар да, цо хьалкхоаб таханардар.

Цун кхоллам - из дӀаяхача ханашка гӀолла къамаьлага вехаш хилар да, цун хӀара дош ноахала юкъера бувзам хотташ да. Цунца ба Гӏазданаькъан Аьсета поэтически начӀала мах, из гӀалгӀай литературанна ийша а ца Ӏеш, къаман ерригача культуранна эшаш да.