- Мерем, мишта вӀаштӀехьдоал, хьона хетачох,  вайнаьха студентий массаза шоай Ӏадаташ лораде, царна мутӀахьа хила?

- Сона хетачох, тхо вӀашкаозаш дар да, боккхагӀбараш лоархӀаш, къаман Ӏадаташ лорадеш хилар. Цӏен гаьна долча хана а, тхоай Ӏадаташ леладу оаха, дакъа лоацаш хул вайнаьха вахаре, массаза а тхоайла эшача гадоаккх. Из тха гаргара  бувзамаш  хотташ дола тай да.

- Масса саг ва шун юкъарлон чувоагӀаш?

 - Тха тоаба латт 21 сагах. Хӏаране шийгара дакъа юкъедахь, тайп-тайпара новкъостал деш.

- Мишта дӀахьу СтГАУ  нохчий, гӀалгӀай цхьоагӀон Денош?

- Оаха царга кийчо ю геттара чӀоагӀа. Цӏай хьахулаш хьалха, массаза санна репетицеш ю - хьалххе а кийчъю кхоллама номераш. Массахана кхетаченаш йолаш, цига дакъа лоацаш хул ректор, дин викалаш.

Нохчий, гӀалгӀай цхьоагӀон Ди дӀахьош; къаьстта белгалдеш да нохчий, гӀалгӀай даарех чам баккхар, иллеш алар, халхараш гойтар, тоабашта вайнаьха культура йовзийтар. Цар шера цкъа таро хул тха когаметта  хила. Гойтама зале доакъашхошта дувц къаман гӀирсех, даарех, юххера а кагийнах арабоал байракхашца, мехкарий - къаман гӀирсашца, цунца цхьана гойташ къаман тӀабувхабу гӀирс, белгалонаш. ДукхагӀа хьаьшашта дезар да лоамарой халхар, укхаза Ӏомабу хӀара гӀа баккха, юххера а кхетаче чакхйоал ловзарца. Из чӀоагӀа безаме а хоза а да!   Сога хаьттача, цу тайпарча культуран оагӏонаша тхона новкъостал ду. Цар Ӏомабу шоайла къаман культураш еза, лархӀа, шоай цхьоагӀо, Ӏадаташ доа ца де. Из бахьан долаш керда бувзамаш хотталу, доттагӀал леладу, тайп-тайпара культураш йовз, цу юкъе тхоайдар лора а деш.

- Малав шоана новкъостал дер, цу тайпара хьалаш вӏашагӏдохкача?

- Шеддар хьаллоацар къаман наха хьалха латта кулгалхо ва, бакъда дукха гIончий юкъебоал из вӀашагӀдолла. Къаьстта бола къахьегам дӀахьораш волонтёраш ба. Цар доккха новкъостал ду викторинаш, яхьаш дӀахьош.

- Мишта леладу вай кагирхоша арахьа эхь-эздел?

 - Из тхона лоархӀаме да. Цӏен гаьна дар аьнна, оаха лораду вайнаьха эхь-эздел. Кхыча нахаца гӀулакхаш а иштта леладу, хӀана аьлча вай культурага гӀолла дӀагойта деза, вай из  лораеш хилар.

- Хьехам беш дош ала ловргдарий хьона гӏалгӀай е нохчий студенташка?

- Лораде шоай Ӏадаташ, дакъа лоацаш хила къаман наьха вахаре, шоайла новкъостал деш, эшача хьаллоацаш, тоабашца цхьана болх беш хила, кхыйола культураш лархӀа. Цо новкъостал ду ше вар хила, моллагӀча хьалашка дегӏавоагӏаш хила.

- Каст-каста нийслой арахьа вайнаха шоайла  хьаллоацаш? Сенца белгалдоал из?

- Массахана уж кийча ба новкъостала бахка. Кагирхой хаттараш нийслу, уж дувзаденна да дешарца, вахарца, цу хьалашка Ӏамарца. Цхьайолча хана духхьал хьехам бича а кхоачам болаш хул. Иштта хьаллоацаш хилар гучадоалаш хул цхьана кхетаченаш дӏаяхьарца е дин гӀулакхаш леладарца.

- МалагӀа кхетаченаш дукхагӀа лоархӀаш я кагирхошта юкъе?

- Къаьстта  яьржа я тха нохчий, гӀалгӀай культурах йола кхетаченаш. Из духхьала моттиг хинна Ӏац; цига исторех, Ӏадатех, къаман гӀулакхех дувц. Цул совгӀа, кагирхошта хоза хет говзанча хьехамаш дӀахьош, довзара оагӀонаш, сайренаш, цӀи хезача  вайнаха хетаяь.

- МалагӀа ловца боаккхаргбар  Ӏа Ставрополерча паччахьалкхен ахархой университета студенташта?

- Шоай дешара тӀехьа аьттув хилба цар, керда новкъостий, шоайла гадаккхар ма эшалда. Студентий вахар сийрда, диза хилда, шоай Ӏадаташцара бувзам хоадабаь ха ма йоагӏийла  цӀаккха а!

- Марем, баркал тхоца къамаьл  дарах. Аьттув хилба шун цу дикача гӀулакхашка.