Белгалде деза, вай мехкарча къаман библиотеке «Терроризма духьале лоаттаерех хила», «Терроризма духьала да дуне» яха кхетаченаш, сайренаш йоаржаеш даим болх лоаттабелга. Кхувш латтача къонача тӏехьен массахана хьалхадоах, цу бӏехача, доккхача зуламах хьокхавеннар ший ираз доадаь саг волга, бусалба динца из эггара доккхагӏа дола зулам долга. Тахан вай ерригача республике дӏахьош болх ба из. 

Массайолча моттигашкарча культуран цӏеношка, цу зуламах ма дарра дувцаш, кхетаченаш йоаржаеш латт. Тӏема операце доакъашхой, тайп-тайпарча оагӏонашцара МВД болхлой, дийша нах, терроризм яхача зулама духьале лоаттаеча моттига болхлой юкъе болаш дӏакхухьаш я уж кхетаченаш. Денала урокаш, иштта кхыйола кхетаченаш лоаттаярца кхоана боккхача новкъа баьнна дӏаотта безача къонабарашта дувц хӏара саг ший хӏама лорадеш, Даьхе езаш, машар, барт, цхьоагӏо хургьяр доаржадеш дӏаваха везилга. Къаьстта йоккха терко тӏаозаш я кхоллама яхьаш. Видеороликашка, шоай сурташка, байташка гӏолла зулама массахана духьале лоаттае езилга, вахаре цун моттиг йита йиш йоацилга белгалду къонабараша. Белгалде деза, укх тӏехьарча шин шера вай мехка цу оагӏонцара 33 эзар совгӏа саг чулоацаш 650 кхетаче дӏайихьалга. 

Культуран оагӏонцарча министерствос ӏаьдала, дешара, юкъарча оагӏон моттигашца бувзаме йолаш цхьана дӏабихьа боккха болх ба из. Терроризм яхача зулама духьале лоаттаеча Халкъашта юкъерча Ден хетадаь боламаш чакхдоах мехка. Дукха ха йоацаш, мехкарча къаман кхоллама Цӏен болхлоша йоаржайир «Тхо терроризма духьала да» яха семинар. Кхувш латтарий цу оагӏонцара кхетам чӏоагӏбара тӏехьа дӏахьош болх бар из. Тахан вай дика кхетаду, цу доккхача, унзарча зулама духьале лоаттаяр массайолча моттигашкара хьадоагӏаш хила деза. Цӏагӏа, дешара моттигашка, ара кхувш латтача къонача тӏехьен хьалхадаха деза хӏама да из, цар дегаша из мел доккха во да кхетадергдолаш.

Хӏаьта культуран оагӏонцарча моттигашка гӏолла из лоархӏаме болх хьаллацар геттара эшаш да тахан, хӏана аьлча кхолламо бӏаргадайт, низ тӏалоаттабар, адам халчаоттадар мел унзара, лертӏача сага хьаллаца йиш йоацаш хӏама да. Къаман беркатеча ӏадаташка, культурага гӏолла дукха хӏама довзийта, дуккхача беркате хургдолча хӏамашта дегаш хьаделла йиш я берий. Из никъ хьаллаьца саг ший хӏама толхадаьрех, Дала хьаденнача хозача дунен, дикача хӏамай хам цаберех волга бӏаргадайта деза къонабарашта.

Тахан, ураоттача хана, цар дегашка ӏочудижар кхоанарча вахаре а чӏоагӏденна латтаргда. Дӏабихьача тохкамо хьагойт, культуран Цӏеношка, библиотекашка, кхоллама оагӏонашка из болх дикка хьаллоацаш йолча моттигашка зулам кӏезигагӏа даржаш латтилга. Тахан вай массане цхьана къахьега дезаш гӏулакх да из! Таханара къонабараш вай кхоане я, цудухьа кхувш латтарашца цу оагӏонцара кхетаченаш дӏакхахьар лоархӏамеча гӏулакхех да таханарча вахаре!