Пхьилекъонгий Заур тахан доккхача дешаца вовзийта везаш суртанча вац. Цун дега лоархIаме да ше леладер гонахьарча наха дезаш хилар, иштта ший наха ше хьаллоацаш хилар.

ХIара цун болх Даьхенцара боккха безам гойташ ба. Тахан из вовзараша оалаш да, цун сурташка гIолла кхоллама кIоаргача, доккхача наькъашка гIолла гобаккха йиш я аьле. ХIара цо даьккха сурт ший къаманцара лерхIам вайна гойташ да.

Укх тIеххьарча диъ шера Заура дIадихьад театра, гIалгIай гIалашта, къоаношта хетадаь гойтамаш. Тахан кхоллама балхашца къахьегарашцара, лакха начIал дарашцара ший лерхIам гойташ ва из. «ГIалгIайчера боккхагIбола пхьараш» яха суртгойтам хьабийллар цо, дукха къахьийга, уйла яь. Цхьацца балхех чуийнна боахка пхьараш ба сурташ тIа латтараш.

«Сурташ цар хьаяьча хIамашта даьхе, пхьараш шоаш тIехьашкахьа бус массахана. Сай декхар хийтар сона, наха лакха говзал йола вай пхьараш дIабовзийтар», - дийцар Заура. Цун балхашка я теникаш хьаеш, Iоаеш йола Iахилганаькъан Зарета. МоллагIча ханага кхаьчача кхалнаьха дог дошадеш да цун балхаш.

Пхьиденаькъан Мухьмада болх шаьмали яхача баьцовгIах хьабеш ба. ДаьттагIе вахаш волча цу сага хьаеш йола пхьегаш массане тамаш еш, чIоагIа, яйга я. Цхьаккха а дегIа зе деш йола хIама хьокхаяланза йола пхьегIаш тахан къаьстта чIоагIа эшаш, цул совгIа дуккхача шерашка яхаргйолаш я.

Жовхьарашца болх беш йолча суртанчан БIарахой Амината балхаш къегаш йолча хIамашца тоадеш, хьадеш да. Iарчакханаькъан Мадинас джут баьций мазаех, галеш деча кIадаех хIамаш хьаю тахан, массавар цецвоаккхаш. ЧакхсадоагIаш йола, тIоадал чуозаш йоаца, дикка яхаш йола уж хIамаш лоархIараш дукха ба.

Оздой Хьасан вай мехка вовзаш ва моллагIча тIоарска хIаманца болх бе ховш хиларах. ХIама тоаеш, боккха болх ба цо чакхбоаккхар. БIарахой Фатима дикка гаьнаяьннай фертах кIувсаш хьадеш. Чоалхане болх ба цо царца дIахьор: тха къаждеш, тIаккха оалхаш дIайолаяле; дIахо тайп-тайпара басараш деш тхана, ирача урсаца сурташ дехкаш, догам деш, кIайча зигаца гом буллаш, иштта кхыдола балхаш деш.

Заура сурташка гIолла вай къаман лакха говзал, начIал дола нах байзар мехкахошта. ХIара суртага хьожаш ха яьккха, дукха хIама зе йиш я, кхыметтел малагIча тайпара дега хьал долаш говзанчо из болх дIахьош латт а тIехьа.

«Заур дика, эздийча гIалгIай кхалсага кхеваь воI ва. Цо дIахьоча балхо хьагойт, ший къам, ший мохк цунна дезилга, дега боча долга», - аьлар РФ театральни болхлой моттигерча Союза кулгал деча Ховтанаькъан Дугурхана.

Цу гойтамах доккха совгIат хилар из мел вовзарашта, иштта берригача мехкахошта. ГIалгIай къаман пхьарий говзалах, начIал дарех ший сурташка дувцаш волча Заура дег чу дукха да…

Иштта беркате хIама доаржадеш, шоай кулгашца хьакхоллаш бола нах дуккха хилба вай къаман!