Цхьайолча хана нийслу, цIаьхха, шелал этте гаьн тIа мел бола сом гIорабеш, кIотаргаш тIара зизаш Iолегаш; бакъда, хетаргахьа, цунна бехке я вай етташ йола хими йоалла молхаш а, из вайна гонахьа массанахьа йолаш я.

Наха из зийна дукха ха я, цудухьа парникаш лелаю. Ала йиш яц тахан ГIалгIайче уж лелаеш бараш дукха ба, аьнна, бакъда шергара шу массаза доал уж дукхагIа хулаш боагIа. Из да цу гIулакха терко ераш совбоалаш боагIилга, царна лов лаьтта леладе, шоай бешара яьккха моша хIама яа, цудухьа лаьттах дIадолла мара ца дезаш, моллагIа дола ги хьалкхеду цар цкъа хьалхагIа.

Из кхы хала гIулакх а дац. Саьргех тIера кеп хьаю, цу тIа диткъа килёнка тох, цу чу тайп-тайпара баьцовгIаш лелаю. Цига эшар да каст-каста царга хьожаш хилар.

Цхьайолча духхьал кхоале йича а мегаш я, догIашта кIалгIоргйоацаш дIайийна хIамаш, цар уж догIаш делхаш йола ха зе ца хулаш йоккхаргйолаш, зизаш Iолегаргдоацаш моттигерча ханага хьежа. Геттара дIайха денош эттачул тIехьагIа, тIа тхов болаш кхоале хиларо уж кIалхарйоахаргья йоага ца еш, зизаш Iолегаргдац.

ДукхагIа болча Россе бахархоша санна, ГIалгIайчен бахархоша а хьаеш я цу тайпара йоккха йоаца гIишлош, шоашка долча гIирсех. Цига накъайоал хьийнача хIамах яь турбаш, йоккха йоаца арматура, аьшкасаьрг, ардакх, кизга Iоакъа, кхыдараш. Дика хьувкъам кхебарал совгIа, цу тайпара болх дIахьош хилча, довза йиш я дукха хIама, из Iомалу ше-шийца цхьацца хIама де. Лаьтташ леладераша яхачох, карарча шера дукхагIа йолча моттигашка сомаш во хилар: гуржий боалаш, боалаш, гIамгIаш, хьачаш, хьайбаш. Царна юххьанца сийрда, хоза зиза теха хиларо сатувсилга йора, укх шера дика хьувкъам хургхиларах.

Бакъда доладелар вай дийца догIаш, цул тIехьагIа сурт сиха хувцаделар. Из цIаькха а хьалхадоаккхаш да массанена а хIаранена а, Iалам лакха мах болаш хIама да, саг из лораде декхарийла ва, тIаккха ше лораву цо, ший хьал тоаду.

Бакъдар аьлча, геттара а дика хургдар къаьсттача дезалаша теплицаш лелайоре, амма цар дIадех тIехьара тIа хулаш дола зе. Хетаргахьа, хила тарлу вай кагирхошта юкъе шоай доалахьара хIама леладе ловраш, цу гIулакха тIехьа шоай низ а ахча а дIадахийта кийчабараш. Масала, шоаш хьалкхедаь, уж базар тIа дIадехкача; цох хулаш бола пайда бовзараш. Из дикача, пайданеча гIулакхех цаI да, шийга долаш дар совдаккхара.

Ховш да, ханаш хувцаенна хиларца йIовхал этталга, из хьал кхы а 30 шера хила мегаш да, цудухьа лаьрххIа йола йIовхал царна цахилар Iаткъаш а доацаш, йоккха йоаца теплица хьаяьчул тIехьагIа, шоаш бахача юрта дукхагIа болча наха из дика проект хургьяр. Цул совгIа, вайна гуш да Къилбаседа Кавказа бахархоша укх массехк шера из иштта леладеш хилар, къаьстта юрташка бахача наха.

Иштта белгалду, карарча хана наха дукха ийду кийча даараш, керда баьцадаараш, сомаш, могашал дикагIа хилийтара бола кхача. Юкъера хьаийцача, тахан юрта вахача сага кходу налха, марш, коартол эцара дIадодаш дар, бакъда цу юкъе цун корадоагIа помидораш, нарсаш эца ахча. Берригаш а безам болаш ба хоза а могаш а хила, дика а да из.

Дукха пайда хьабоалаш хургдар тахан ГIалгIайчен базар тIа зIамига теплицаш йохкаш хилча, масала, 6-3 метр йолаш, къаьсттача дезалаша шоаш вIашагI а ехка лелаергйолаш, шоай даькъ тIа. Бакъда мах а селлара боккха боацаш хила беза цар.

Цу тайпара гIирсаш базар тIа дохкаро а ший тайпара наха пайда лургбар. Уж хургда, нагахьа санна шоай лаьтта къахьега тIерабараш дукхагIа хуле. Из пайда беш да, оашош хьалкхедаь баьцадаараш, сомаш шо бохкаш деце а. Керттердар да из тика тIара е базар тIара оаш эцаш цахилар, ший аргIагIа цо лораду шун цIагIара дIадодаш дар.