Келаматанаькъан Махьмуд-Ӏаьлас ГӀалгӀайчен дешархой даькъалабийцар дешара Денца
Тахан МагӀалбика кхален Долакоарча №7 йолча ишколе дӀахьош хиннача цӀайна хетаяьча кхетаче дакъа лоацаш, веза хьаьша хилар республикан кулгалхочох Келаматанаькъан Махьмуд-Ӏаьлах; мехка Ӏилман, дешара министра декхараш кхоачашдеш вола Цхьорой Ахьмад-Баширах, иштта кхыболча хьаьшех.
«Келаматанаькъан Махьмуд-Ӏаьлас даькъалабийцар дешара денца дешархой, хьехархой, берий даьй. Цо белгалдир, дешар хургдолча вай вахаре чӀоагӀа лоархӀаме хилар. Цо берашта ловца баьккхар, дика дешархой царех хилар ловш. Иштта хьехархой; сатем, сабар долаш; шоай хьаькъал берашта дӀадалара тӀакхувш хилар лайра цунна.
Кхетаче хоза дӀайихьар. ЦхьоалагӀча классе долхача берашта геттара чӀоагӀа цӀай дар из, вӀалла а дицлургдоацаш», - аьлар «Сердало» газетага ГӀалгӀайчен Ӏилман, дешара Министерстве.
Тахан хьалхара гургал тохаш хезад ГӀалгӀайчен 88 эзар дешархочоа, царех 9 эзар духхьашха ишколе чувоалаш вар. Республикан ерригача ишколашка дӀайихьар дешара Денна хетаяь цӀайца ювзаенна кхетаченаш.
